… Vijon nga dje

Sekretari i Përgjithshëm i Federatës Shqiptare të Basketbollit bën analizën e tij. Veprimtaritë, kombëtaret e moshave, kombëtarja e të rriturave dhe gjithçka tjetër në fokusin e tij. Sekretari i Përgjithshëm i Federatës Shqiptare të Basketbollit, Korab Llazani, në një intervistë ekskluzive për AlbanianSport.com, ka bërë një analizë të gjerë të punës njëvjeçare të sportit të koshit në vendin tonë.

Basketbollit, për hir të së vërtetës duhet pranuar se për veprimtaritë kombëtare vjen i dyti pas futbollit, ka një shtrirje të gjerë. Veprimtarie jo vetëm me të rriturit dhe të rriturat, por dhe të rinjtë, të rejat, paratërinjtë, Nën-14-vjeçarët, Nën-12-vjeçarët dhe Nën-10-vjeçarët. Dhe për rrjedhojë tashmë janë krijuar dhe kombëtaret e moshave, të cilat bëhen gati të marrin pjesë në Kampionatet Evropiane.

Jo vetëm kaq, por në fokus është dhe kombëtarja e të rriturave, si dhe projekti për Shkollat e Basketbollit. Me të gjitha këto, ndonëse ka ende për të bërë, basketbolli shqiptar është kthyer gradualisht në një industri të rëndë. Por ajo që dhëmb është infrastruktura, e cila ka ende për t’u përmirësuar dhe për t’u rregulluar. Ja dhe pjesa e dytë e intervistës së Sekretarit të Përgjithshëm të Federatës Shqiptare të Basketbollit, Korab Llazani, për AlbanianSport.com. Të enjten ishte pjesa e parë, të premten e dyta, sot po ju sjellim pjesën e 3-të, ndërsa të dielën do t’ju sjellin edhe pjesën e 4-t dhe të fundit:

… Vijon nga dje

– Më 7 mars është firmosur një marrëveshje bashkëpunimi me Ministrinë e Arsimit dhe Sportit për Shkolla e Basketbollit. Çfarë është bërë që mjediset sportive të shkollave të jenë dhe për sportin e koshit?

– Këtë fakt e konsideroj si shumë të rëndësishëm për të gjithë ne. Për këtë qëllim është përgatitur një plan veprimi. Koha e nënshkrimit të marrëveshjes përkon me pragmbylljen e vitit shkollor. Tani jemi në një periudhë përgatitore, që këtë veprimtari ta fillojmë së bashku me vitin e ri mësimor. Federata Shqiptare e Basketbollit po zbaton një projekt për trajnerët e rinj në bashkëpunim me FIBA-n dhe Solidaritetin Olimpik Ndërkombëtar, i cili ka për synim përgatitjen,standardizimin dhe licencimin e trajnerëve që do të merren dhe me projektin tonë “Shkolla e Basketbollit”.

– Kosova është tashmë anëtare e Federatës Evropiane të Basketbollit. A duhet konsideruar një kundërshtar me shumë për ne, apo ndeshjet me ta, përtej fituesit, do të jenë përsëri miqësore dhe vëllazërore?

– Më së fundi, edhe Federata e Basketbollit të Kosovës u bashkohet federatave të tjera evropiane si anëtare dhe pjesëmarrëse në veprimtaritë e saj që këtë vit. Tashmë me statusin e një vendi të pavarur, Kosova do të përfaqësohet në të gjitha veprimtaritë e mundshme dhe, për rrjedhojë shorti mund ta vendosë atë edhe përballë nesh. Natyrisht që fryma miqësore dhe vëllazërore nuk do të mungojë, por gara mendoj se duhet respektuar nga të gjithë.

– Së fundi, tashmë në rolin e një specialisti të mirrëfilltë të basketbollit shqiptar, Real Madrid fituese e Ligës së Kampioneve. A ishte ky një përfundim logjik i të gjithë veprimtarisë?

– EuroLiga, apo Liga e Kampioneve është një veprimtari, i cili po fiton një terren gjithnjë e më të madh në sportin evropian. Patëm fatin që ta përcjellim me shumë emocione në formën e një spektakli. Për mendimin tim, Reali i Madridit e meritoi plotësisht këtë trofe.