ASNN – Ndonëse vetëm pak ditë më parë sporti më i suksesshëm shqiptar në arenën ndërkombëtare, peshëngritja, mori një goditje me lajmin se Romela Begaj ka rezultuar pozitive për përdorimin e substancave të ndaluara, një tjetër lajm aspak i mirë vjen ngafronti i shtangës kuqezi.

Ndonëse ende nuk është zyrtare, madje është e mbështjellë me një tis të trashë misteri dhe paqartësie, mësohet se në zyrën e Federatës Shqiptare të Peshëngritjes ka mbërritur sot një “e-mail”, që informon se njëri prej 3 sportistëve shqiptarë që konkurruan në Evropianin e Nën-23-vjeçarëve dhe Të Rinjve në Qipro, ka rezultuar pozitiv për përdorim të substancave të ndaluara.

AlbanianSport.com ka mësuar nga burime zyrtare, por jo pranë FSHP-së, se sportisti në fjalë ka marrë edhe medalje në këtë Evropian dhe, ndonëse këto burime, duke kërkuar të ruajnë anonimitetin e tyre, nuk kanë pranuar të japin emrin e këtij sportisti, një logjikë e thjeshtë të çon në faktin se ky sportist është Hysen Pulaku.

Ai u shpall kampion Evrope në një stil dhe nënkampion në stilin tjetër dhe në dygarësh, ndërsa dy sportistët e tjetër, Sopot Sula dhe Aleks Kaçani, nuk e arritën podiumin. Zyrtarët e Federatës Shqiptare të Peshëngritjes nuk u janë përgjigjur telefonatave të AlbanianSport.com e as “sms”-ve.

I vetmi që ka hapur telefonin për AlbanianSport.com, por nuk ka pranuar të bëjë asnjë lloj komenti ka qenë Sekretari i Përgjithshëm i Federatës Shqiptare të Peshëngritjes. Po kështu nuk ka patur asnjë reagim nga Komiteti Olimpik Kombëtar Shqiptar dhe as nga Antidopingu shqiptar.

Mbetet për t’u parë se cilat do të jetë zhvillimet në orët në vijim të mbrëmjes, por duket se gjithçka do të sqarohet nesër. Vlen të theksohet se Hysen Pulaku sapo ishte rikthyer nga një pezullim dyvjeçar për përdorimin e substancave të ndaluara gjatë Lojërave Olimpike “Londër 2012”.

Kjo nënkupton se sportisti rrezikon dënim të përjetshëm, ndërsa në rrezik është edhe fati i Shqipërisë si ekip. Pulaku është medalisti i 4-t shqiptar në arenën ndërkombëtare të peshëngritjes që rezulton pozitiv për përdorimin e substancave të ndaluara, pas Fetije Kasës, Erkand Qerimajt dhe Romela Begajt.