ASNN – Tanimë kanë mbetur vetëm 6 javë dhe gara për titullin “kampion” në Kategorinë Superiore të Kampionatit Kombëtar të Futbollit është bërë mjaft e ashpër, pasi vetëm dy pikë e ndajnë Skënderbeun kryesues nga Partizani i vendit të dytë. Të dy rivalet  luajnë dy ndeshje të vështira jashtë fushe këtë javë dhe do të jenë gjithë sy e veshë tek takimi i njëra-tjetrës.

Skënderbeu dhe Partizani do të vazhdojnë garën në distancë për titullin “kampion” me dy vizitat të vështira në javën e 31-të të Superiores, që zhvillohet ditën e hënë. Kampionët në fuqi luajnë kundër Tiranës, ndërsa të kuqtë e kryeqytetit zbresin në fushën e Kukësit. Por titulli “kampion” në nivelit më të lartë të kampionatit shqiptar të futbollit duket se do të vendoset në përballjen direkte mes Skënderbeut dhe Partizanit.

Megjithatë, deri në atë që është cilësuar që tani si finalja e sezonit, dy favoritët duhet të kalojnë pengesa të tjera të rëndësishme. Java e 31-të e kampionatit elitar të futbollit në vend që do të luhet të hënën ka rezervuar dy ndeshje të vështira jashtë fushe për kryesuesit. Vetëm për shkak të kalendarit, i pari që do të zbresë në fushën e lojës është Partizani.

Dhe Rrjeti i Radio-Televizionit Shqiptar do të sjellë për sportdashësit drejtpërdrejt sfidën më interesante, atë midis Kukësit dhe Partizanit. Të kuqtë do të vizitojnë Kukësin në një sfidë aspak të lehtë. Vendasit janë skuadra më në formë e momentit dhe pasi siguruan finalen e Kupës së Shqipërisë, kërkojnë të bëjnë të njëjtën gjë me sigurimin e Ligës së Evropës nga vendi i tretë i renditjes.

Pasi do të mësojë rezultatin e rivalëve direktë, Skënderbeu do të luajë në orën 19:00 në Stadiumin “Selman Stërmasi” të kryeqytetit kundër Tiranës. Rezultatet negative të javëve të fundit e kanë vështirësuar pozicionin e skuadrës së trajnerit Mirel Josa, ndërsa dy pikët e vetme diferencë në krye të renditjes nuk u lejojnë korçarëve asnjë hap fals.

Kjo sfidë do të ishte shumë e fortë në një kohë tjetër, por me shumë probleme, Tirana ka treguar gjatë këtij sezoni se është një skuadër e kalueshme. Sfidat e rëndësishme në garën për titullin “kampion” duke se kanë kaluar në plan të dytë një tjetër përballje shumë të rëndësishme në javën e 31-të. Bëhet fjalë për ndeshjen e Shkodrës, ku Vllaznia pret Flamurtarin.

Kjo është një sfidë direkte mes dy skuadrave, shumë larg emrit të tyre të madh dhe që në këtë sezon kërkojnë qëndrimin në Kategorinë Superiore. Nga kjo përballje kërkon të përfitojë Bylisi, që në ndeshjen e tij luan në shtëpi kundër Laçit. Në sfidën tjetër të javës së 31-të të Kategorisë Superiore, Tërbuni kthehet në fushën e tij pas fitores suprizë kundër Skënderbeut dhe kërkon të përsërisë të njëjtin sukses edhe ndaj Teutës.

Korçarët, kampionë në fuqi, kryesojnë renditjen e Kategorisë Superiore me 66 pikë, dy më tepër sesa Partizani i vendit të dytë, ndërsa Kukësi i vendit të tretë ka mbetur prapa, në kuotën e 52 pikëve.