In memmoriam në 10-vjetorin e ndarjes nga jeta të futbollistit, që 17 vjeç veshi fanellën bardheblu. AlbanianSport.com ju sjell në disa pjesë këtë dosier dhe sot është pjesa e katërt dhe e fundit e tij.

… vijon nga dje

Në fundvjeshtën e atij viti, Astriti thirret për të kryer shërbimin ushtarak, çka bëri që për dy vite me radhë ai të kontribuoi në radhët e Besës së Kavajës. Kur u kthye në dhjetor të vitit 1972, Tirana po “notonte” në ujëra të turbullta. Nga ekipi ishin larguar emra të njohur si Frashëri, A. Mema, Ishka, Xhaçka, O. Mema, Bukoviku, Kazanxhiu, Tafaj etj. Ecuria e skuadrës në kampionat linte shumë për të dëshiruar.

Formacioni i skuadrës nuk kishte stabilitetin e duhur dhe rezultatet mungonin. Ndoshta për këtë situatë të vështirë që po përjetonte skuadra, Astrit Nurishmi, që ishte rikthyer plot energji për të kontribuar në gjirin e skuadrës ku u rrit eu formua si futbollist u la jashtë vëmendjes, së stafit teknik. Një moment tejet i vështirë në karrierën e tij sportive, çka e detyroi të kërkonte largimin për t’u aktivizuar me Dinamon.

Por drejtuesit e klubit të asaj kohe nuk ia mundësuan këtë gjë. Gjendur në një situatë të tillë, 22-vjeçari Nurishmi u detyrua t’i thotë lamtumirë përgjithmonë futbollit, sportit të tij të zemrës, kur kishte ende aq forca e energji për të dhënë. Dëshironte shumë, që njëri nga djemtë t’i bëhej futbollist, por edhe kjo dëshirë e zjarrtë nuk iu mundësua. Megjithatë, duhet theksuar se një prej djemve të tij, Lysien Nurishmi, ia ka plotësuar disi amanetin.

Ai është njëri prej zyrtarëve më të spikatur dhe më të palodhur të Federatës Shqiptare të Futbollit. Më 19 gusht 2005, pas një sëmundje të rëndë e të pashërueshme, ende i ri në moshë vetëm 55 vjeç, u nda nga jeta për të mbetur i paharruar në zemrat e admiruesve të skuadrës bardheblu, të “Tiranës së Artë” të viteve 60-të pjesëtar dinjitoz i së ciës ishte edhe ai, Astrit Nurishmi.

Skeda

Emri:                           Astrit

Mbiemri:                     Nurishmi

Vendlindja:                Tiranë

Datëlindja:                 14 maj 1950

Roli:                            Mesfushor

Numri në fanellë:     2

Ekipet ku ka luajtur:

Të rinjtë e Tiranës:   1965-1967

Të rriturit e Tiranës:  1967-1970

Besa e Kavajës:       1970-1972

Trofe të fituara:

Dy herë kampion me Tiranën më 1968 dhe në sezonin 1969-1970.

U nda nga jeta: më 19 gusht 2005

Vijon nesër…