Ashtu siç ka ndodhur gjithmonë këto vitet e fundit, edhe në Botërorin e Kazakistanit delegacioni shqiptar i peshëngritjes nuk ka patur asnjë mjek me vete, i cili është i dosmosdoshëm në evente të tilla, sidomos ato ndërkombëtare. Sikundër raporton “Top Channel”, lidhur me këtë çështje, Vladimir Gjonaj, drejtori i Sporteve në Ministrinë e Arsimit dhe Sportit, shprehet: “Kjo është kompetencë e Federatës, ajo e gjykon vendin e grumbullimit, trajnerin dhe praninë ose jo të mjekut.”
Në çdo vend evropian, para nisjes në një veprimtari ndërkombëtare, sportistët i nënshtrohen një testi antidoping të bërë nga Komisioni Antidoping i vendit përkatës. Drejtori i Sporteve Gjonaj, i cili është njëkohësisht dhe anëtar i Komisionit Kombëtar Antidoping, thekson se sportistëve tanë që morën pjesë në Botëror nuk u është bërë asnjë test nga ana e tyre para nisjes në Kazakistan. “Nuk është bërë një test para evenimentit”, – ka thënë ai për median në fjalë.
“Testi duhet kërkuar nga vetë Federata pasi është e vështirë ekonomikisht që të bëjmë teste para çdo aktiviteti”, – ka shpjeguar Drejtori i Sporteve në MAS. Në pjesën më të madhe të vende evropiane, Komisioni Antidoping është një komision i pavaruar. Drejtori Gjonaj thekson se edhe në Shqipëri ky komision është i pavaruar, ndërkohë që në ligjin për sportin thuhet se ky është thjesht një strukturë këshillimore e Ministrisë dhe nuk ka kompetenca ekzekutive.
“Komisioni Antidoping në vendin tonë është totalisht i pavarur, madje në këtë Komision nuk ka më zv/ministra apo drejtorë policish si më parë, – theksoi Gjonaj. – Nuk shoh asnjë lloj varësie pasi nuk kam marrë kurrë asnjë urdhër për t’i thënë Komisionit si të veprojë.” Në fund, Gjonaj i bashkohet deklaratës së KOKSH-it ku thuhet se përdorimi i substancave të ndaluara nga ana e sportistëve të përfshihet në Kodin Penal si një vepër e dënueshme ligjërisht:
“Sportisti, trajneri apo mjeku që tenton të arrijë një rezultat të pamerituar, domethënë të mashtrojë, të parashikohet në Kodin Penal që të dënohet me sanksione si gjobë apo burgim”, – ka përfunduar Vladimir Gjonaj, drejtori i Sporteve në Ministrinë e Arsimit dhe Sportit.
