ASNN – “Mungesa e qetësisë na ndëshkoi”.  Trajneri i Dinamos, Dritan Mehmeti, flet pas ndeshjes, analizon ndeshjen dhe paraqitjen. Është mundur minimalisht të hënën përballë Vllaznisë në Durrës, por duke folur pas ndeshjes, trajneri i Dinamos theksoi se, më shumë sesa kundërshtari, skuadrën e tij e ndëshkoi mungesa e qetësisë. “Më vjen shumë keq por ky është futbolli, ndaj është i bukur se është i paparashikueshëm”, – ka thënë ai fillimisht.

“Fillimin e nisëm shumë mirë në minutat e para, duhej të ishim të kujdesshëm se edhe pse e dija që Vllaznia do të përgjigjej me kundërsulm dhe kështu na ndëshkoi, – ka vijuar trajneri i të kaltërve. – Por është edhe meritë e lojtarit dhe për mua është eurogol si e ekzekutoi. Por unë dua të përgëzoj pothuajse të gjithë çunat për mentalitetin si interpretuan lojën sot, të vjen keq dhe e vetmja gjë ndjej keqardhje është që dëshira të çon në gabim dhe nuk ruan qetësinë.”

Trajneri i Dinamos theksoi se skuadra e tij kishte dominuar, por nguti për të barazuar shifrat kishte bërë që të humbeshin raste të shumta para portës. “Sidomos në situata që duhet të zgjidhim më të qetë situatat, – ka thënë ai. – Megjithatë mendoj që duhet të qetësohemi patjetër se kemi ndeshje shumë të fortë pas pak ditësh. Më vjen keq për kartonët, se marrim shumë e duhet të jemi më të kujdesshëm. Megjithatë, futbolli kështu është e duhet të shohim ndeshjen tjetër.”