Dinamo me mungesa, por organika ofron një organikë për një formacion fitues. Trajneri: “Të gjitha skuadrat janë të vështira. Por tanimë varet edhe nga karakteri i lojtarëve në fushë.” Dinamo u ka dhënë dorën e fundit përgatitjeve për ndeshjen me Tomorin, të cilat i ka zhvilluar dje në mesditë, ndërsa tashmë është gati për të përballuar me sukses ndeshjen me beratasit. Sipas trajnerit të bluve, Dritan Mehmeti, nuk do të mund të jetë justifikim terreni me bar artificial, topi, apo gjyqtari në rast të një rezultati jo i duhur në përballjen e sotme.
“Ne e kemi përgatitur gjatë gjithë javës ndeshjen me Tomorin, – ka deklaruar ai. – Por ato që kemi bërë në stërvitje duhet të shprehen në fushën e lojës. Që do të thotë se tashmë varet në karakterin e lojtarëve sa të gatshëm janë ata për të dhënë më të mirën dhe për ta nxjerrë me sukses ndeshjen me Tomorin. Unë besoj se skuadra është e ndërgjegjshme për aftësitë e saj dhe kam bindjen se do të japi më të mirën. Në grupin tonë të gjitha skuadrat janë të vështira, ndërsa luhet me pikë shumë të vogla. Ajo që duhet të them është unë është se gara nuk ka përfunduar me humbjen ndaj Lushnjës.”
“Dakord që ishte një rival direkt, por përderisa janë dhe 14 ndeshje, atëherë të gjitha shanset luhen, – vijoi trajneri blu. – Kemi mungesa, sepse Hysenbelliu e Muça janë të dëmtuar, Turtulli e ka ndjerë përsëri dëmtimin që ka pasur në Antalia, Arifaj i skualifikuar. Megjithatë skuadra e ka organikën e atillë që në çdo moment duhet të jetë një formacion fitues në fushën e lojës. Nuk do të jetë një ndeshje e lehtë. Por megjithatë shpresoj dhe besoj se do t’ia dalim. Tashmë gjithçka është në dorën e lojtarëve, sepse ne ia kemi bërë hyzmetin në stërvitje.
Ndërsa sot në Pezë-Helmës, apo thënë ndryshe në fushën e Akademisë së Futbollit “Internacional” pritet të ketë edhe tifozë të shumtë. Të paktën sezonin e kaluar, Dinamo ka fituar 1-0, kurse në fazën e parë ka barazuar në Berat, 0-0. Dhe Dinamo, nëse fiton me Tomorin, është ende në lojë për në Kategorinë Superiore dhe nuk ka hequr dorë nga ky objektiv.
