Pasurohet kontingjenti i Dritan Mehmetit, në skuadër edhe Klajdi Kuka e Andi Çeka. Ish-futbollisti: “Tek Partizani dhe Tirana nuk kishte hapësira për mua, kjo ishte zgjidhja më ideale”. Dinamo kthen kampionët e saj. Pas Daniel Xhafajt, kampion me blutë në sezonin 2001-2002, tashmë është pjesë e skuadrës dhe mesfushori Igli Allmuça. 34-vjeçari kthehet tek dinamovitët pas tre vite e gjysmë, teksa pat luajtur si tek Skënderbeu, ashtu dhe tek Kukësi.
Allmuça është “kampion” në dy sezone me dinamovitët, më 2007-2008 dhe më 2009-2010, si dhe fitues i Superkupës së Shqipërisë më 2008-tën. Në fakt ka qenë një bisedë e gjatë mes administratorit të bluve, Ismet Saliaj, dhe mesfushorit Igli Allmuça, që është konkretizuar dje në mesditë, ndërsa lojtari është parë dje në stërvitje. Sipas mesfushorit, pamundësia për të gjetur hapësira tek Tirana dhe Partizani, të cilat kanë konkurrencë të madhe në skuadër, e bënë që të kthehej tek Dinamo.
Dhe kjo pa asnjë mëdyshje me qëllimin e mirë që të kontribuojë në ngritjen e skuadrës në Kategorinë Superiore pas tre vjetësh mungesë. “Erdha te Dinamo sepse ishte e vetmja mundësi që të qëndroja në kryeqytet, – ka pohuar ai. – Te Tirana dhe Partizani ishte e pamundur të luaja për shkak të konkurrencës kështu që vendosa të kthehem te Dinamo, me qëllimin e vetëm ngjitjen në superiore. Shpresojmë që me eksperiencën tonë të japim kontribut për arritjen e objektivave.”
“Unë e kam ndjekur me kujdes ecurinë e Dinamon dhe mendoj se duhet të kishte grumbulluar më shumë pikë gjatë fazës së parë. Kemi bërë gjëra të bukura gjatë periudhës që unë kam luajtur me Dinamon, ndërsa shpresoj që një gjë të tillë ta bëjmë dhe tani”, – ka shtuar Allmuça, ndërkohë që më pas stërvitja e bluve ka qenë e plotë. Daniel Xhafaj konsiderohet pjesë e bluve, por vetëm se më parë duhet të vijnë dhe letrat nga Amerika.
Ndërkohë organika e skuadrës së Dritan Mehmetit është pasuruar dhe me portierin Klajdi Kukën dhe futbollistin Andi Çeka. Janë pesë ardhje të reja, duke futur këtu dhe Turtullin, i cili ende nuk ka marrë letrat nga Teuta. Megjithatë të sigurt për Dinamon bëjnë dhe Bilibashin, që vazhdon stërvitjen me blutë, por që duket se është ende me mendje për të shkuar në Greqi.
