Elbasanasi i portës dinamovite vlerëson mbrojtjen blu dhe të gjithë ekipin e trajnerit Mehmeti: “Nuk i njoh kundërshtarët e tjerë, por pavarësisht përforcimeve të tyre Dinamo është emër i madh”. “Në Lushnjë do të shkojmë vetëm për të fituar”. Kështu e ka nisur bisedën e tij për “Gazeta e Sportit”, elbasanasi i portës dinamovite, Elvis Kotorri, i cili i është bashkuar skuadrës gjatë tregut të lëvizjeve të futbollistëve në dimër. Sipas tij, skuadra me të gjitha përforcimet që ka bërë e meriton të jetë sezonin e ardhshëm në Kategorinë Superiore.
“Nuk i njoh kundërshtarët e tjerë dhe nuk nisem fare nga përforcimet e tyre. Por mendoj që Dinamo është një emër shumë i madh i futbollit shqiptar dhe që i duhet Kategorisë Superiore. Me të gjithë stërvitjen që kemi bërë, por dhe me afrimet që janë bërë, ku një pjesë e mirë janë lojtarë të cilët kanë dalë kampion me këtë ekip, them që duhet të jemi në Superiore. Nuk është ndeshje e lehtë, por mos harroni që është Dinamo”, – ka theksuar Kotorri, që më pas ka vlerësuar dhe mbrojtjen që ka përpara.
“Janë të gjithë djem të rinj dhe me shumë perspektivë, – ka thënë ai. – Por bashkëpunimi i të gjithëve jo vetëm i portës që e mbroj unë, apo dhe i mbrojtjes, do të bëjë atë që Dinamo të arrijë qëllimin final, i cili është ngjitja në Kategorinë Superiore”. A do të ishit të kënaqur me barazimin? Kjo ka qenë pyetja që “Gazeta e Sportit” i ka bërë portierit Kotorri. Dhe përgjigja e tij: “Në fushën e lojës ne do të hymë për të fituar”, – ka premtuar ai.
“Më pas se si do të rrjedhin ngjarjet, edhe pse nuk mund të parashikojmë që tani, mund dhe të kënaqemi me barazim. Nuk mendoj se gjyqtari do të jetë i njëanshëm, sepse janë dy skuadra, të cilat kanë qenë në Kategorinë Superiore. Dhe si të tilla me nivelin që kanë si skuadra do ta ndihmojnë nivelin e lojës. Shpresojmë që të dalë një ndeshje e bukur dhe në fund të fitojë më i miri”.