ASNN – Dinamo ka mundur Besëlidhjen 2-0 në ndeshjen e javës së dytë të Kategorisë së Parë të Kampionatit Kombëtar të Futbollit. Pas dy javëve të para skuadra e trajnerit Igli Allmuça është në kuotën e 6 pikëve në renditjen e grupit A. Vendasit janë më kërkues që në fillim të takimit teksa rrezikojnë që në minutën e 9-të, kur Rei Nuriu brenda zonës nuk arrin të prekë topin e ardhur nga një harkim.

Në fakt janë disa lojtarë dinamovitë që kërcejnë në zonë por asnjëri prej tyre nuk arrin ta prekë e ta dërgojë më pas topin në rrjetë. Më pas është Prendi që gjuan bukur me të majtën por portieri e largon topin në goditje këndi. Këmbëngul Dinamo me një sulm të gjatë, por futbollistët kryeqytetas nuk janë të saktë e kështu iu japin mundësinë miqve nga Lezha të largojnë topin nga zona.

Minuta e 15-të, tjetër sulm i gjatë i Dinamos, largojnë mbrojtësit e Besëldihjes, por topi përfundon te Selimaj. Ai provon me një goditje nga jashtë zone, por pa sukses, topi kalon mbi shtyllën horizontale. Në të 24-ën minutë është Kristian Prendi që finalizon një ndër sulmet e shpeshta të dinamovitëve. Pas topit të ardhur nga e djathta e sulmit, Prendi me zgjuarsi e dërgon topin në rrjetë dhe 1-0 për Dinamon.

Me këtë rezultat mbyllen 45 minutat e para. Edhe në pjesën e dytë, Dinamo ka inisiativën, ndërsa sulmet e  Besëlidhjes thyhen para zonës së mbrojtur nga kryeqytetasit. Por në këto minuta që flasin për Dinamon, vjen edhe momenti I 11-metërshit. Në një nga sulmet e rralla të miqve, Dollani depërton brenda zonës, provon të kalojë portierin Laço, pengohet nga ky i fundit dhe gjyqtari Ziri jep 11-metërsh.

Është Pasha që nga pika e bardhë gjuan dhe shënon në minutën e 72-të. Por gjyqtari e anulon golin pasi disa futbollistë kanë hyrë brenda në zonë para kohe. Edhe njëherë Pasha nga pika e bardhë, por këtë radhë Laço i thotë “jo” golit, duke e grushtuar topin. Në këtë mënyrë porieri dinamovit korrigjon atë gabim që bëri në shkaktimin e 11 -metërshit.

Vendasit vazhdojnë sulmet e tyre dhe në të 82-ën minutë, është Çema që depërton nga e majta brenda zonës së Besëlidhjes, por gjuajtjen e tij e largojnë më pas mbrojtësit. Tre minuta para përfundimit të kohës së rregullt të takimit, Dinamo shënon edhe golin e dytë. Është Çema, që këtë radhë është i saktë, teksa fiton duelin në ajër me mbrojtësit lezhjanë dhe e dërgon topin në rrjetë.

Po të shtunën janë luajtur edhe ndeshjet e tjera në grupin A dhe B, në përfundim të të cilave u arritën rezultatet e mëposhtme:

Kategoria e Parë

Java e 2-të

Grupi A

Të shtunën:

Dinamo – Besëlidhja                                    2-0

Iliria Fushë-Krujë – Shënkolli         3-1

Korabi Peshkopi – Erzeni Shijak   1-0

Veleçiku Koplik – Vora                    2-1

Të dielën:

Burreli – Vllaznia                 ora 16:00

Grupi B

Të shtunën:

Pogradeci – Tomori                         0-1

Bylis – Turbina Cërrik                     2-0

Elbasani – Egnatia Rrogozhinë    1-2

Lushnja – Oriku                               1-0

Të dielën:

Besa – Apolonia                  ora 16:00