Në fakt në një vendim të datës 17 nëntor 2010, qeveria e kryeministrit Sali Berisha e kishte kaluar Dinamon nga Ministria e Brendshme tek Ministria e Turizmit, Kulturës, Rinisë dhe Sporteve. Parë kështu, në kushtet kur qeveria e sotme e kryeministrit Rama ka nisur të bëjë projektin për shndërrimin e ish-kompleksit blu në qendër të madhe olimpike, atëherë është dashur ky vendim, sepse deri më dje i gjithë ambienti, pavarësisht se që nga 17 shkurti 2011 është në vartësi të Agjencisë së Shërbimit të Sporteve, ishte krejtësisht në ajër.
Dhe këtë gjë ka dashur ta bëjë të ditur dhe administratori i bluve, Ismet Saliaj, paçka se sipas tij vendimi i djeshëm i qeverisë nuk ka të bëjë me shoqatën e futbollit Dinamo. “Edhe kur është marrë vendimi më 17 nëntor 2010 për kalimin e klubit sportiv Dinamo në vartësi të Ministrisë së Turizmit, Kulturës, Rinisë dhe Sporteve, asnjëherë nuk është ekzekutuar, – ka theksuar ai. – Megjithatë vendimi i djeshëm nuk ka të bëjë me ne, sepse ne nuk kemi pasur vartësi prej vitesh nga Ministria e Brendshme dhe për rrjedhojë më pas dhe nga Ministria e Turizmit, Kulturës, Rinisë dhe Sporteve.”
“Sepse ne jemi shoqatë private, jo fitimprurëse, që bëjmë një aktivitet të caktuar që është futbolli, – ka vijuar administratori i bluve kryeqytetas. – Por ajo që dua të them unë është fakti se duke kaluar tashmë tek sporti shpresojmë dhe dëshirojmë që të kemi më shumë vëmendje që edhe ne të funksionojmë si të gjitha klubet e tjera të futbollit shqiptar”, – thotë Saliaj. E vërteta është se që nga 2005, kohë në të cilën jo vetëm futbolli i Dinamos, por dhe i gjithë shumësportëshi i bluve varej nga Ministria e Brendshme, blutë e hoqën administrimin financiar prej shtetit.
Kjo dhe me kërkesë të ish-presidentit Besnik Sulaj, i cili nisi gradualisht ta privatizonte klubin. Madje deri më 2010-tën, Dinamo ka pasur katër aksionarë, të cilët ishin Besnik Sulaj, Avni Braçe, Apostol Goci dhe Alban Aliko. Dhe që pas 2011-tës, gjithçka është shkrehur dhe Dinamo është me qira në ish-shtëpinë e vet.
