ASNN – Gratë në futboll në Francë përballen me një luftë të vazhdueshme për t’i pranuar ato si lojtare, pasi shpesh ato trajtohen si objekte, pavarësisht rritjes së tyre të dukshme profesionale dhe mbulimit mediatik të tyre. Kështu është shprehur trajnerja e përfaqësueses franceze të futbollit të femrave, Korinë Diakre. Ajo ishte në Hong Kong, udhëtim i organizuar nga FIFA për të punuar me trajnerin e futbollit atje, Çan Juen-ting.

Diakreja bëri histori kur ajo u bë trajnerja e parë femër e një ekipi profesionist të meshkujve në Francë, në 2014 dhe tani shpreson të drejtojë kombëtaren e femrave drejt fitimit të Botërori, që do të zhvillohet vitin e ardhshëm në shtëpinë e tyre. Por ish-kapitenia e Francës, e cila luajti 121 ndeshje ndërkombëtare ku shënoi dhe 14 gola, tregon se karriera e saj nuk ka qenë e lehtë.

“Kur fillova futbollin në vitet 1980, ishte shumë e rrallë të shihje një vajzë duke luajtur, sepse mendohej se kjo lojë ishte vetëm për meshkujt, – tha ajo për Agjencinë Franceze të Lajmeve (AFP). – Por për fat të keq ende ka shumë gjëra negative në futboll. Jo vetëm diskriminimi seksual, por gjithashtu dëgjoj shumë biseda rreth racizmit dhe këto janë gjëra shumë të vështira për t’u zgjidhur në vitin 2018”.

Diakreja tha se mbulimi mediatik i futbollit të femrave, duke përfshirë transmetimet e drejtpërdrejta të lajmeve të ligës më të lartë të Francës, ishte “zhvilluar jashtëzakonisht” përpara Botërorit. Por përkundër përparimeve të tilla, ajo tha se jeta në futboll mbetet e ndërlikuar dyfish për gratë, sepse ata duhet të luftojnë me faktorët që nuk përballen meshkujt.

Ndërsa përsa i përket pretendimit për fitimin e trofeut të Botërorit, ajo shprehet: “Pse sot jemi të tretët në renditjen e FIFA-s, ne nuk jemi favoritë. Kështu që do të hyjmë në këtë veprimtari si të gjithë të tjerët”. Franca ndodhet në grupin A, së bashku me Norvegjinë dhe Nigerinë.