Studenti e Dinamo, dy skuadra për nivelit të dytë të Kampionatit Kombëtar të Volejbollit për Femra, që njihet si Grupi A2, duket se e luajnë këtë sport “për hall”. Nuk ngjajnë aspak me skuadra profesioniste, por si ekipe shkollash, të cilat nuk arrijnë të presin as topin e parë, nuk organizohen si duhet sepse lojtaret e këtij roli nuk ngrihen dot as një centimetër nga toka dhe për rrjedhojë ndeshja mes tyre jo vetëm që lë shumë për të dëshiruar, por dhe është në nivelin zero.

Diferencat vijnë vetëm nga individët të tilla si Alldervishi, që dje ka shënuar 13 pikë me sulm dhe një me shërbim, Zavalani 10 pikë me sulm, një me shërbim dhe 3 me bllok, apo dhe Hani 12 pikë me sulm dhe 4 me bllok, Demo 14 pikë me sulm dhe 3 me shërbim. Përgjithësisht këto kanë qenë lojtaret më të mira të ndeshjes, sikurse dhe Muça me 5 shërbime të sakta, Murati me 4 shërbime të sakta, Maja me 5 shërbime të sakta dhe Lulo me 6 shërbime të sakta.

E të gjitha janë individë që nëse do të kenë një trajtim ndryshe dhe më me nivel mund të bëhet dhe të mos qëndrojnë në ato ku ekipe ku duket se janë “rrafsh me tokën”, Në totalin e katër seteve Studenti ka realizuar 85 pikë prej të cilave 54 pikë vetë, kurse 31 pikë kanë ardhur nga gabimet e dinamovitëve. Në krahun tjetër, Dinamo ka shënuar në katër sete 94 pikë prej të cilave 73 pikë vetë, kurse 21 pikë kanë ardhur nga gabimet e Studentit.

Dinamo ka arritur të fitojë dy setet e para, 20-25 dhe 17-25, dhe atëherë kur mendohej se po e merrte ndeshjen 3-0, Studenti ka fituar setin e tretë 25-19. I katërti është pikë më pikë, por që fitohet prej Dinamos, 23-25 dhe krejt ndeshja 3-1. Veçse për nivelin e paraqitur në fushë, kjo për të dyja ekipet, vetëm volejboll nuk mund të quhet…

Studenti – Dinamo              1-3

(20-25, 17-25, 25-19, 23-25)

Studenti: Alldervishi, Jahja, Zavalani, Muça, Murati, Sina, Koraqe / Yzeiraj. Trajner: A.Farka

Dinamo: Hani, Demo, Nexhipi, Miraka, Maja, Lulo/Shahaj, Jangozi (L), Leka, Elezaj. Trajner: G. Nexhipi

Gjyqtarë: K. Agolli, E. Kurti (Tiranë)

Kampionati Kombëtar

i Volejbollit – Femra

Grupi A2

Java e 9-të

(27 shkurt 2016)

Të shtunën:

Vlora Volej – Lushnja          0-3

Studenti – Dinamo              1-3

Minatori – Korabi                  1-3

Apolonia – Divjaka              3-0

Renditja

Nr.       Skuadra         N.        F.         H.        Setet               Pikë

1. Lushnja 9          9          0          27-0                27
2. Korabi 9          7          2          23-9                22
3. Dinamo 9          5          4          17-15              15
4. Divjaka 9          4          5          14-17              13
5. Apolonia 9          4          5          12-17              11
6. Minatori 9          3          6          13-19              9
7. Vlora Volej 9          3          6          13-23              8
8. Studenti 9          1          8          7-26              4