ASNN – Trajneri i Kombëtares kuqezi, Xhovani De Biazi, ka qenë sot i pranishëm në seancën stërvitore të skuadrës së Partizanit, ku ka ndjekur nga afër mënyrën e përgatitjes së të kuqve kryeqytetas. Sipas italianit, kjo vizitë është në vazhdën e punës së tij për të njohur nga afër mënyrën e stërvitjes së skuadrave shqiptare, si dhe vëzhgimi i disa prej lojtarëve kandidatë për fanellë kuqezi.
Në atë që ai e quajti një vizitë në vazhdën e punës së tij për të njohur nga afër mënyrën e stërvitjes së skuadrave shqiptare, si dhe vëzhgimi i disa prej lojtarëve kandidatë për fanellë kuqezi, trajneri i Kombëtares, Xhovani De Biazi, ka qenë sot mysafir në mjediset ku Partizani zhvillon stërvitjen në periferi të kryeqytetit. Në prag të ndeshjes me Armeninë, De Biazi ka zgjedhur vëzhgojë 3 lojtarët e të kuqve kryeqytetas, portierin Alban Hoxha, mbrojtësin Almir Rrahmani dhe mesfushorin Emiljano Vila.
“Takimin me Armeninë e vlerësoj si ndeshjen e ndeshjeve, – ka deklaruar italiani i pankinës kuqezi. – Po i ndjekim lojtarët dhe natyrisht do të afrohen ata që janë më në formë. Unë them se kam afruar më shumë lojtarë të kampionatit shqiptar se çdo trajner tjetër. Në varësi të formës së tyre janë gjithmonë 5 ose 6 lojtarë të kampionatit shqiptar të grumbulluar.”
Duke kujtuar se takimi me Armeninë më 29 mars në “Elbasan Arena” do të jetë tepër i vështirë, De Biazi shpreson se lojtarët që kanë ndryshuar ekip të jenë në formë. Kombëtarja ka 4 pikë pas 3 ndeshjeve eliminatore të Euro 2016-tës. Vendimi i UEFA-s për ndeshjen me Serbinë e ka ndëshkuar përfaqësuesen, por një fitore me Ameninë do të shtonte më shumë shpresat për pjesëmarrje në finalet e Evropianit.
