ASNN – Xhovani De Biazi ka dhënë një intervistë për “Mesaxhero Veneto” duke bërë një analizë të vitit 2015 përsa i përket kombëtares shqiptare. Trajneri italian ka folur edhe për nisjen e punimeve në Stadiumin Kombëtar “Qemal Stafa” në kryeqytet. Gazeta italiane në fjalë i ka kushtuar një hapësirë të veçantë trajnerit të kombëtares shqiptare Xhovani de Biazi.

Në një intervistë, dhënë për median italiane, ai ka folur fillimisht për kombëtaren shqiptare gjatë vitit 2015 dhe kualifikimin e arritur për në “Euro 2016”. “Në finalet e Euro 2016 shorti na ka caktuar me Francën, Zvicrën dhe Rumaninë, – ka deklaruar ai. -Francën e kemi mundur, Rumania është në rritje dhe Zvicra është fortë. Duam të bëjmë figurë të bukur atje.”

“Do të jetë e vështirë, por do ta shesim shtrenjtë lëkurën, – ka thënë trajneri italian. – Këtë bindje e bazoj tek fakti se futbollistët shqiptarë janë shumë të lidhur me flamurin dhe japin në fushë 101%.” Më tej De Biazi ka shuar kureshtjen e gazetarëve italianë teksa I është përgjigjur pyetjes për kushtet ku stërvitet kombëtarja shqiptare. “Kushtet mungojnë”, – pohon ai.

“Kombëtarja stërvitet gjithmonë në fushën e një hoteli në Durrës, – ka vijuar 60-vjeçari i stolit të Kombëtares kuqezi. – Është përcaktuar që në 1 prill 2016 do të hidhet guri i parë në stadiumin e ri në Tiranë, që do të jetë një gjë shumë e mirë për ne. Por ndërtimi i tij natyrisht që kërkon kohën e vet.”