ASNN – Jusein Bolt ka fituar çmimin prestigjoz “Laureus”, një nga mirënjohjet më të rëndësishme të botës së sportit. Ikona e atletikës së lehtë, e fiton për herë të katërt në karrierë këtë çmim. Për femra këtë çmim e fiton Simonë Bajls, fituese e katër medaljeve të arta në gjimnastikë në Olimpiadën “Rio 2016”. Çmimet Laureus u jepen sportistëve të disiplinave të ndryshme, të cilët kanë arritur rezultatet më të mira gjatë vitit.
Ceremonia u zhvillua në Montekarlo. “Sportisti i vitit” u shpall Jusein Bolt. Atleti xhamajkan, njeriu më i shpejtë në tokë, i mbiquajtur “Rrufeja”, ka fituar 3 medaljet e arta në Olimpiadën Rio 2016. Çmimin kampionit të atletikës ia dorëzoi një tjetër legjendë e atletikës, Majkëll Xhonsoni. Bolti ka lënë pas konkurrentë të tillë si futbollisti Kristiano Ronaldo, basketbollisti Lëbron Xhejms dhe Endi Mërrej.
Për femra këtë çmim e fitoi gjimnastja amerikane, Sajmën Bajlls, fituese e katër medaljeve të arta në Olimpiadën “Rio 2016”. Trofeun ia dorëzuan Nadia Komaneci dhe Princi Alberto i Monakos. Skuadra e vitit u shpall “Çikago Kabs”, kampionia amerikane e bejsbollit, që kanë fituar “World Series” pas 108 vitesh, nga hera e fundit. Ata lanë pas në konkurrim Realin e Madridit dhe Portugalinë, kampione të Evropës.
Trofeun amerikanëve ia dorëzuan Eduin Mozes dhe një nga patronët e çmimeve, Tom Rikets. Supriza e vitit u takoi Niko Rosbergut, pilotit gjerman të Formula 1, i cili fitoi Kampionatin e kaluar Botëror. Trofeun e dorëzoi Luis Figo. Për rikthimin e suksesshëm në sporti, fitues u shpall amerikani, Majkëll Fellps, që është në fakt notari më i madh i të gjitha kohërave.
Njeriu me më shumë medalje në historinë e olimpiadave, plot 28 të tilla, është rikthyer dominues sërish në Olimpiadën “Rio 2016”. Çmimin ia dorëzoi legjenda e tenisit, Boris Beker. Një çmim ka qenë edhe për sportisten më të mirë të vitit me aftësi të kufizuara. Fituese është shpallur italiania Bebe Vio, në sportin e skermës, e cila fitoi një medalje të artë dhe një të bronztë në Paralimpiadën “Rio 2016”.
