ASNN – Edhe Shqipëria mund të hyjë në historinë e Xhiros së Italisë në 2016-n. Këtë e ka konfirmuar për të përditshmen më të madhe sportive shqiptare, “Panorama Sport”, presidenti i Federatës Shqiptare të Çiklizmit, Skënder Anxhaku. Vizita “blic” e zhvilluar ditën e fundit në vendin tonë e Roberto Todeskos, përfaqësuesit të prestigjiozes italiane “La Gazzetta dello Sport” (që është edhe sponsori i përgjithshëm i Xhiros së Italisë), me krerët më të lartë të sportit në Shqipëri ndezi dritën jeshile që elita e çiklizmit botëror të përshkojë edhe territorin e Shqipërisë pas dy viteve.
Paraditen e djeshme, Todesko ka pasur një takim me drejtorin e Sporteve, Vladimir Gjonaj dhe shefin e Sportit Elitar, Arjan Konomi, të cilët shprehën mbështetjen maksimale që Xhiro e Italisë të përshkojë Shqipërinë. Më pas, i dërguari zyrtar i “Grand Tour”-it, sipas presidentit Anxhaku iu rezervua një pritje edhe në zyrat e Komitetit Olimpik Kombëtar Shqiptar nga Presidenti Viron Bezhani. Sipas drejtuesve të KOKSH-it, kjo garë do të vlente shumë për sportin, njëherësh do të ishte një publicitet i madh për Shqipërinë në fushën e turizmit në arenën ndërkombëtare.
“Dy janë opsione të mundshme, që gara të nisë nga Tirana me 20 xhiro në kryeqytet e të vijojë rrugëtimin drejt Sarandës, – ka sqaruar kreu i dyrrotakëve shqiptarë. – Mes diskutimeve u propozua që çiklistët pjesëmarrës të bëjnë një ndalesë në pedonalen e Vlorës për të vijuar në Sarandë dhe më pas në Konispol. Gjithashtu, u hodh ideja edhe e një etape nga Rruga e Kombit. Ky projekt ka marrë edhe miratimin e presidentit të UCI-t apo të Federatës Italiane. Por seria e negociatave nuk ndalet këtu, pasi janë parashikuar takime të ministres Lindita Nikolla edhe me ambasadorin italian.”
“Urojmë e shpresojmë që kjo të bëhet realitet për Shqipërinë”, – përfundoi presidenti Anxhaku, duke folur për të përditshmen në fjalë. Zyrtarisht për këtë është vënë në dijeni nëpërmjet një shkrese edhe ministrja Nikolla nga pala italiane.
