Në ceremoninë e hapjes së Rrethit të 72-të çiklistik të Shqipërisë përveç presidentit të Federatës Shqiptare të Çiklizmit, Skënder Anxhaku, dhe Sekretarit të Përgjithshëm Alfred Tahiraj, kanë qenë të pranishëm dhe Presidenti i Komitetit Olimpik Kombëtar Shqiptar, Viron Bezhani, si dhe Sekretari i Përgjithshëm Stavri Bello.
Jo vetëm kaq, por ka qenë i pranishëm dhe drejtori i sporteve në Ministrinë e Arsimit dhe Sportit, Vladimir Gjonaj, përgjegjësi i sportit elitar Arjan Konomi dhe përgjegjësja e sportit në shkolla Elvira Baze. E mandej edhe Presidenti i Federatës Shqiptare të Mundjes, Martin Biba, si dhe Sekretari i Përgjithshëm i saj, Ndriçim Spahiu, së bashku me zëvendëspresidentin e Federatës Shqiptare të Mundjes, Ndoc Çokaj.
Të gjithë e kanë përshëndetur Rrethin dhe i kanë uruar suksese. “Për ne është eveniment që ky i yni është rrethet më të vjetra në Evropë, – ka përfunduar Anxhaku. – Jo pak, por 90 vjet, ndërsa fituesi i parë është Jonuz Gjylbegu. Siç e shihni dhe nga gara e parë ka shumë konkurrencë dhe besoj se e tillë do të jetë edhe deri në fund.”
“S’më mbetet gjë tjetër vetëm t’i uroj suksese të gjithëve në këtë Rreth çiklistik”, ka përfunduar kreu i organizmit që qeveris dyrrotakët kuqezi, ndërsa sot vijohet me etapën e dytë, Tirana-Shkodër, e gjatë 94.3 km, e cila e ka nisjen në ora 10:00, nga Qafa e Kasharit drejt Veriut.

Rrethi i 72-të Çiklistik i Shqipërisë

Rezultatet teknike të etapës së parë (prologut)

Rreth rrotullimi TEG – kthim tek Qendra Kristal
(Tiranë – 12.6 kilometra)

1) Besmir Banushi (Apolonia) 14’29”
2) Ylber Sefa (Kosova) 14’59”
3) Marko Stankoviç (Novi Pazar) 15’04”

Etapat e Rrethi të 72-të Çiklistik të Shqipërisë

Sot Tiranë – Shkodër 94.3 km
2 tetor Shkodër – Burrel 98.3 km
3 tetor Burrel – Durrës 122 km
4 tetor Durrës – Vlorë 118 km
5 tetor Vlorë – Përmet 118 km
6 tetor Përmet – Fier 125 km