Stankoviç dhe Apolonia janë fituesit e Rrethit të 72-të Çiklistik, ndërsa Presidenti Anxhaku ka vlerësuar kontributin e skuadrave, të Policisë së Shtetit dhe të gjithë atyre që ndihmuan në mbarëvajtjen e veprimtarisë më madhor të dyrrotakëve shqiptarë. Marko Stankoviç, çiklisti i Novi Pazarit, jo vetëm që është fituesi i etapës së fundit Përmet-Fier e gjatë 125 kilometra, por dhe fituesi i Rrethit të 72-të Çiklistik të Shqipërisë.
Një sukses që serbi e ka të përsëritur, sepse është fituesi i këtij Rrethi edhe vitin e kaluar, ndërsa kështu duket se ia ka marrë dorën rrugëve të Shqipërisë. Jo më kot është dhe fituesi i 3 etapave të këtij Rrethi Çiklistik, i cili ka përfunduar dje. Dhe për të përforcuar fitoren e tij në çiklizmin shqiptar, Stankoviç është fitues në Shkodër-Burrel, Lushnjë-Përmet dhe Përmet-Fier. Ndërkohë që Besmir Banushi ka marrë garën e kronometrit, Ylber Sefa është fitues në etapën e dytë Shkodër-Burrel, kurse Marolino Hoxha në Burrel-Durrës.
E keqja e këtij rrethi, sikurse nuk ka ndodhur në asnjë edicion tjetër, ka qenë shkurtimi i etapës Durrës-Vlorë e kjo për arsye të fondeve financiare të ekipeve. Gjithsesi dje në Fier në vendin e dytë ka mbërritur Ylber Sefa, kurse në të tretin Qëndrim Guri. Ndërkohë në renditjen e përgjithshme individuale vendi i dytë dhe i tretë janë ndarë mes Ylber Sefës dhe Besmir Banushit, kurse si ekip, duke vazhduar traditën e viteve të fundit, ka dalë fitues Apolonia.
Në përfundim të rrethit, presidenti i Federatës Shqiptare të Çiklizmit, Skënder Anxhaku, ka vlerësuar faktin se organizimi dhe pjesëmarrja e ekipeve ka qenë e suksesshme, ndërsa veprimtaria madhore e dyrrotakëve në vend më shumë se i arrirë. Përfundimisht Marko Stankoviç dhe Apolonia janë fituesit e Rrethit të 72-të Çiklistik të Shqipërisë, kurse duhet përmendur dhe puna e mirë që ka bërë policia e shtetit në mënyrë të veçantë ajo e qarkullimit rrugor.
