ASNN – Është mbyllur sot pasdite edhe etapa e dytë e Rrethit të 76-të Çiklistik të Shqipërisë, me itinerar Shkodër-Elbasan, e gjatë 189.2 kilometra. Ka qenë një etapë emocionuese, por pa probleme, ku edhe në finish nuk pati asnjë çiklist që kishte krijuar distancë me të tjerët, por ishte Samuele Zambeli ai që preku i pari vijën e finishit, në qendër të qytetit të Elbasanit.
Për shkak të motit të mirë dhe terrenit jo shumë të vështirë, nuk ka patur probleme apo rrëzime të rrezikshme nga ana e pedaluesve gjatë kësaj gare, ndërsa ka qenë disi e vështirë për të përcaktuar fituesin e kësaj etape dhe për ta zbardhur saktësisht fituesin u desh ndërhyrja e teknologjisë me fotofinish, për ta përcaktuar përfundimisht edhe fituesin e kësaj etape.
Pas verifikimeve, fitues u shpall italiani Samuele Zambeli me kohën 4 orë, 28 minuta e 14 të qindtat. Pas tij, me po të njëjtën kohë u renditën dy bashkëkombësit e tij, Mirko Sartori dhe Lorenco Kataldo. Pavarsisht kësaj, Shqipëria është ajo që mban fanellën e verdhë, atë të kryesuesit të turit të 76-të, pas dy “sprinteve të para”, me Ylber Sefën që deri më tani ka qenë më i shpejti kundrejt rivalëve të tij.
Ndërkohë, fanella e gjelbërt dhe ajo e bardhë mbahet nga fituesi i etapës së djeshme, italiani Samuele Zambeli. Fanella e kuqe i takoi Devid Fransenit nga Belgjika. Ndërkohë, nesër do të bëhet nisja e etapës Elbasan-Vlorë, për të vazhduar një ditë më pas me Vlorë-Sarandë dhe për t’u mbyllur me Sarandë-Fier më 24 maj 2019. Ky është edicioni i 3-të i Rrethit të Shqipërisë, që është pjesë e kalendarit ndërkombëtar të UCI-t.
