ASNN – “Dyrrotakët” shqiptarë kanë zhvilluar veprimtarinë e dytë të këtij sezoni, Trofeun “26 Marsi”, një garë e përvitshme e Federatës Shqiptare të Çiklizmit (FSHÇ), që mbahet në Kavajës. Në këtë veprimtari moren pjese te gjitha ekipet e Shqipërisë, Tirana, Apolonia, Partizani, Vllaznia, Skënderbeu, Studenti, Elbasani, Besa, si dhe 4 ekipe te ftuara nga Maqedonia e Veriut, ekipi i Kastrotit nga Kosova dhe një ekipi simbolik i Çiklizmit per Femra të Afganistanit.
“Duhet të them se ka qenë një periudhë e vështirë, por, në të njëjtën kohë, edhe një periudhë e këndshme, sepse kemi bërë miq të rinj këtu në Shqipëri, kemi vizituar shumë vende të bukur këtu në vendin tuaj, – ka rrëfyer njëra nga vajzat afgane. – Pra, ka qenë një kohë e kaluar mirë. Pjesëmarrja në këtë garë ishte shumë kuptimplotë për mua dhe për skuadrën time, sepse është një mundësi e mirë për ne për t’iu rikthyer sadopak normalitetit pas vështirësive që kemi kaluar në Afganistan.”
“Kështu që jam e lumtur për veten dhe për skuadrën time që marrim pjesë, – ka vijuar ajo. – Kjo nuk është me të vërtetë një garë për ne, sepse këtu jemi për ta shijuar atë në këto kohë të vështira për ne.” Edhe në këtë veprimtari u garua në 4 kategori moshash, teksa kadetët, apo thënë ndryshe paratërinjtë, përshkuan një itinerar prej 45.9 km, juniorët apo të rinjtë përshkuan një itinerar prej 96.9 km dhe Nën-23-vjeçarët dhe Elita, apo thënë ndryshe të rriturit, përshkuan 110.9 km përgjatë cirkuitit Kavajë-Zhabjak-Gosë-Kavajë.
Tek paratërinjtë, vendin e parë e mori Ankel Limaja i Tiranës, ndërsa podiumin e plotësoi Kosta Vortollomi i Skënderbeut dhe Erdi Pilku po i Tiranës. Tek të rinjtë, i pari në finish mbërriti Servet Kastrati i Vllaznisë, i cili mposhti sfidën e dyfishtë të Teutës, në trajtën e Henri Hysës dhe Hajri Gocajt, në një fitore që për vetë çiklistin shkodran dhe trajnerin e tij, Leonard Kola, ishte shumë e rëndësishme. Sa u përket Nën-23-vjeçarëve, kreun e podiumit e mori çiklisti i Kosovës, Blerton Nuha.
Ndërsa dy shkallët e tjera i plotësuar dy çiklistët e Studentit, Brikel Barçi dhe Ilia Çota. Kurse tek të rriturit, Olsian Velia i Tiranës mbërriti në finish bashkë me Kristel Sotën e Apolonisë, ndërsa i 3-ti mbërriti Bruno Kola i Vllaznisë. Ndërkohë që Kryetari i Bashkisë së Kavajës, Redjan Krali, shprehu mirënjohjen për këtë veprimtari dhe premtoi mbështetje për sportin, presidenti i Federatës Shqiptare të Çiklizmit, Skënder Anxhaku, e ka hedhur vështrimin tek ngjarjet madhore të këtij sezoni të çiklizmit.
