Fitore shpërthyese, ndërsa është e dyta radhazi në Xhiron e Italisë, për Marsel Kiteli, që në sprintin final mbërrin në Arnhem me krahët e ngritur lart përpara Vivianit, Nikolos, Grejpelit dhe Porsevit. Në këtë etapë të tretë, e cila ka qenë përsëri e gjatë 190 kilometra, nga Nimega në Arnhem, gjermani sposton Dumulin dhe merr edhe fanellën rozë duke qenë kryesuesi aktual i Xhiros së Italisë.

Arratija e ditës ka ardhur nga Berlato, Tjalingi (të njëjtit që kanë qene edhe të shtunën), Van Zyl dhe Amezkueta. Avantazhi i arritur nga ky grup me pjesën tjetër të çiklistëve, që i kanë ndjekur nga pas, ka arritur deri në gjashtë minuta. Grupi është kujtuar me vonesë për të lëvizur, por më pas është i papërballueshëm. Afrikanojugori Van Zyl është i fundit që ka rënë nga grupi i çiklistëve që janë shkëputur.

Por ai është kapur nga ndjekësit vetëm 1 kilometra e 700 metra nga finishi. Pastaj ka qenë thjeshtë një punë për çiklistët e shpejtësisë, atje ku Marsel Kiteli nuk ka falur. Ndërkohë ka ardhur një tjetër paraqitje e mirë për Eugert Zhupën, i cili ka qenë me të njëjtën kohë me pjesën më të madhe të çiklistëve që ndiqnin Kitel, ndërsa ishte në vendin e 22-të.

Dhe në renditjen e përgjithshme gjendet në vendin e 95-të mes 198-të pjesëmarrësve. Jo keq për një shqiptar në Xhiron e Italisë. Sot është pushim, ndërsa të martën nis gjithçka nga Kalabria.

Xhiro e Italisë 2016

Çiklizëm – Meshkuj

Renditja e etapës së tretë

(Nijmegen-Arnhem, 190 km)

1)       Marsel Kitel (Gjermani)                   4h23’45”

2)       Elia Viviani (Itali)                              -“-

3)       Xhiakomo Nicolo (Itali)                    -“-

4)       Andre Greipel (Gjermani)               -“-

5)       Aleksandr Porsev (Rusi)                -“-

6)       Kristian Sbaralji (Itali)                      -“-

7)       Moreno Hofland (Holandë)                        -“-

8)       Arnaud Demare (Francë)               -“-

9)       Rik Zabel (Gjermani)                       -“-

10)      Matej Mohoriç (Slloveni)                 -“-

———————————————————-

22) EUGERT ZHUPA (SHQIPËRI)           -“-

Renditja e përgjithshme pas 3 etapash:

1)       Marsel Kitel (Gjermani)                   9h13’10”

2)       Tom Dumulin (Holandë)                          +9”

3)       Andrei Amadord (Kosta Rika)               +15”

4)       Tobias Ludvigson (Suedi)                     +17”

5)       Moreno Mozer (Itali)                                +21”

6)       Bob Jungels (Luksemburg)                              +22”

7)       Matias Brandle (Austri)                          +23”

8)       Roxher Kluge (Gjermani)                      +25”

9)       Çad Haga (SHBA)                                  +25”

10)      Georg Preidler (Austri)                           +26”

——————————————————————

95) EUGERT ZHUPA (SHQIPËRI)               +1’42”