Sekretari Tahiraj konfirmon praninë e kombëtares së Kosovës, Malit të Zi, si dhe skuadrës së Novi Pazarit, ndërsa është në pritje dhe një skuadër italiane. Federata Shqiptare e Çiklizmit tashmë është gati për zhvillimin e aktiviteti të saj më madhor, që është Rrethi i 72-të Çiklistik i Shqipërisë.
Në një njoftim që i është shpërndarë nëntë klubeve pjesëmarrëse, Apolonisë, Teutës, Tiranës, Partizanit, Pogradecit, Vllaznisë, Flamurtarit, Elbasanit dhe Burrelit, Federata Shqiptare e Çiklizmit me president Skënder Anxhaku dhe me sekretar të përgjithshëm Alfred Tahiraj, ka lajmëruar se veprimtaria, që është i miratuar në kalendarin sportiv të vitit 2015, është në bashkëpunim me Komitetin Olimpik Kombëtar Shqiptar dhe Ministrinë e Arsimit dhe Sportit.
Klubeve, jo vetëm sipas njoftimit, por dhe sipas sekretarit të përgjithshëm Tahiraj, u është kërkuar që deri më 26 shtator të dërgojnë listën e delegacioneve pjesëmarrëse, ndërsa më 30 shtator do të bëhet dhe mbledhja teknike në ora 11:00. Në mbledhjen teknike, gjithnjë sipas njoftimit të Federatës Shqiptare të Çiklizmit, do të jenë të pranishëm përgjegjësit e ekipeve, si dhe gjyqtarët.
Ajo që duhet bërë e ditur, të paktën edhe sipas informacionit që ka dhënë Tahiraj, është se do të marrin pjesë skuadra të huaj. Janë të konfirmuara deri më tani kombëtarja e Kosovës dhe Malit të Zi, si dhe skuadra serbe e Novi Pazarit. “Ne jemi në pritje dhe të një skuadra italiane, ndërsa shpresojmë në një rreth çiklistik cilësor”, ka përfunduar Tahiraj.
Vitin e kaluar ka fituar Apolonia si skuadër, si dhe Stankoviç si individ. Por, ashtu siç dhe ka ndodhur në vitet e kaluara, përsëri Rrethi i 72-të Çiklistik i Shqipërisë do të mbyllet në Fier.

Etapat e Rrethit të 72-të Çiklistik të Shqipërisë

30 shtator 2015:
Prolog cirkuit TEG-Kristal Center – kthim 12.6 km

1 tetor 2015:
Tiranë – Shkodër 94.3 km

2 tetor 2015:
Shkodër – Burrel 98.3 km

3 tetor 2015:
Burrel – Durrës 122 km

4 tetor 2015:
Durrës – Vlorë 118 km

5 tetor 2015:
Vlorë – Përmet 118 km

6 tetor 2015:
Përmet – Fier 125 km