ASNN – Luhen të shtunën dhe të dielën me një takim të vetëm tek Nën-17 dhe Nën-19-vjeçarët. Më datë 13 dhe 14 janar 2024 do të luhen ndeshjet e fazës çerekfinale të Kupës së Shqipërisë për grupmoshën e Nën-17 dhe Nën-19-vjeçarëve. Edhe këtë sezon do të jetë i njëjti format, teksa në garë për të fituar këtë trofe të rëndësishëm do të jenë 8 ekipe për secilën grupmoshë, bazuar në renditjen e skuadrave pas mbylljes së fazës së parë.
Të gjitha ndeshjet do të luhen me vetëm një takim dhe në një fushë asnjanëse, në Kompleksin e Ekipeve Kombëtare në Kamëz, teksa janë përcaktuar tashmë edhe çiftet e kësaj faze për të dyja grupmoshat. Kështu, në çerekfinalet e grupmoshës së Nën-19-vjeçarëve, që do luhen duke nisur nga ora 13:00, të shtunën do të luhet duelet Skënderbeu-Tirana dhe Bylis-Dinamo, ndërsa të dielën, por në të njëjtën orë, luhen duelet Partizani-Apolonia dhe Vllaznia-Laçi.
Edhe për grupmoshën e Nën-17-vjeçarëve janë përcaktuar ekipet që do të kalojnë në çerekfinale, pas mbylljes së fazës së parë. Ndeshjet do të zhvillohen në Kamëz të shtunën, 13 janar, aty ku duke nisur nga ora 10:00 do të luhen duelet Skënderbeu-Dinamo dhe Tirana-Laçi, dhe të dielën, më 14 janar, po në të njëjtë orë sfidat Partizani-Apolonia dhe Teuta-Vllaznia.
