E vërteta është se ballshiotët, mbështetur fort në treshen Aliaj, Gega dhe Dervishi, kanë shkaktuar probleme për skuadrën dinamovite. Ata kanë lëvizur shumë në mesfushë dhe kundërshtari i tyre e ka pasur të vështirë për t’i mbuluar. Për rrjedhojë janë hapur hapësirat për të goditur në portën e mbrojtur nga Lamellari. Përgjithësisht ka qenë një lojë e fortë dhe me ndërhyrje të ashpra në mesfushë, ndërsa kryesori Kola është detyruar që shpejt të nxjerrë kartonin e verdhë nga xhepi i tij, teksa ka ndëshkuar Gegën për Bylisin dhe Muçën për Dinamon.

Gradualisht ballshiotët gatuajnë golin e avantazhit, i cili ka ardhur në minutën e 32-të. Në një goditje dënimi për Bylisin, Aliaj ka krosuar saktë në zonën e rreptësisë dhe Gjonbrati, që ka shmangur dhe mbulimin e mbrojtësve blu, me kokë ka ditur të shënojë. Në vazhdim ballshiotët bëhen të ashpër në ndërhyrjet e tyre dhe Buzi ka marrë kartonin e verdhë, kurse në të 42-n minutë, Dinamo ka marrë një goditje dënimi. Arifaj ka krosuar në zonën e rreptësisë ballshiote, mbrojtja vendëse ka qenë krejtësisht e përgjumur dhe Capa nuk e ka pasur të vështirë për të shënuar.

E fundi i pjesës së parë i ka çuar skuadrat në dhomat e zhveshjes me shifrat e barabarta 1-1. Në pjesën e dytë të dyja skuadrat kanë shfaqur dëshirën për të shënuar golin e avantazhit. Sako merr kartonin e tretë të verdhë për Bylisin. Por ajo që ka prishur ekuilibrat në fushën e lojës ka qenë dalja e Turdiut me karton të kuq në minutën e 76-të. Dhe ballshiotët me një forcë më shumë në fushë, kanë gjetur golin e epërsisë në minutën e 80-të, që ka firmën e Gegës, i cili ka shpërblyer mundin e skuadrës së Nenajt.

Kështu, Bylisi kthehet tek fitorja pas pesë javësh, ndërsa në “Adush Muça” suksesi rikthehet pas 11 muajsh. Për dinamovitët kjo ka qenë humbja e parë e të paktën blutë nuk duan ta bëjnë dramë përpara ndeshjes me Butrintin. Mirëpo kartoni i kuq i Turdiut dhe e verdha e tretë e Muçës si asnjëherë tjetër këtë sezon do ta kthejnë skuadrën e Mehmetit më shumë se sa të arnuar. Që do të thotë se në Ballsh ka qenë një humbje me shumë kusure nga pas.

Bylis – Dinamo                                              2-1

Shënues: Gjonbrati 32’, Gega 80’/Capa 42’

Bylisi: Kaloshi, Buzi, Gjonbrati, Bualli, Aliaj, Gega, Sako, Kolgega, Çaushaj, Hoxhaj, Dervishaj. Trajner: R. Nenaj

Dinamo: Lamellari, Rexhepi, Thana, Shkalla, Duqi, Arifaj, Muça, Tafaj, Imami, Capa, Turdiu. Trajner: D. Mehmeti

Gjyqtarë: K. Kola, R. Malaj (Vlorë), R. Zaimi (Poliçan)

Kartonë të verdhë: Gega, Buzi, Sako / Muça

Karton i kuq: Turdiu