ASNN – Butrinti që nga e hëna ka nisur përgatitjet për ndeshjen e parë të pjesës së dytë të sezonit. Bëhet fjalë për vizitën e Pogradecit, e cila do të luhet të shtunën më 7 shkurt 2015 në stadiumin “Gjorgji Kyçyku”. Butrinti, të paktën edhe sipas sarandjotëve, deri në fund të këtij sezoni kuptohet për të përmbushur objektivin kryesor, që është ngjitja në Kategorinë Superiore, ka 16 finale duke nisur nga kjo që luhet të shtunën në Pogradec.
Skuadra e Mustafa Hysit do të ketë mungesa të konsiderueshme, teksa në përballjen me liqenorët për shkak të kartonëve nuk do të jenë as Raboshta e as Mustafaji. Por që nga minuta e parë do të jenë në lojë për Butrintin, Hepaj, Jubani dhe Papa, të cilët janë futbollist që kanë ardhur nga tregu i lëvizjeve të futbollistëve në dimër. Dhe në kushtet kur kjo lëvizje dimërore ende nuk është mbyllur, Butrinti është në pritje dhe të një mesfushori, ndërsa tregu i futbollistëve për Kategorinë e Parë do të mbyllet të martën e ardhshme.
Sakaq tek Butrinti është rikthyer në stërvitje pas disa muajsh një nga lojtarët që ka dhënë shumë në sezonet paraardhëse, Skerdi Myrtaj. 27-vjeçari sot u stërvit i diferencuar, ndërkohë që shumë shpejt do të bashkohet me grupin. Gjithashtu Artan Meçani ka lënduar gjurin në stërvitje dhe dje ka kryer disa analiza për të parë shkallën e dëmtimit. Kësisoj Butrinti duket se është me probleme në prag të ndeshjes me Pogradecin.
