ASNN – Trajneri i Vllaznisë ul euforinë, homologu Shkëmbi “vajton” gabimet si skuadër. “Pikë së pari urime ekipit tim, – ka thënë Tomas Brdariç në fillim. – Kishte shumë dëshirë sot dhe ne e besuam që nga sekonda e parë që jemi të aftë për ta fituar. E kishim harruar që kishim fituar 5-3 me Laçin. Golat e pësuar? Duhet të shoh ndeshjen pas 2-3 orësh me qetësi, e jam i sigurt që do të gjej ndonjë gabim por si fillim jam i lumtur për ne, tifozët, jemi krenarë për mënyrën se si shënuam 6 gola e fituam këtë ndeshje.”
“Para ndeshjes gjithçka ishte në balancë mes dy ekipeve, – ka vijuar gjermani i stolit shkodan. – Ndoshta ne mund të kishim 4 pikë më shumë, ndaj është entuziazmuese si e mbajtëm këtë ndeshje sot se të dy ekipet duan të shkojnë në majë. Ne jemi të dytët dhe mendoj se sot e kemi arritur këtë objektiv që kishim. Ne ende po ndërtojmë Vllazninë e re dhe çdo gjë vjen me kohë. Duhet të jemi të duruar që nga fillimi. Por jemi mirë, nuk e fituam ndeshjen sot. Kemi punuar në dy javët e fundit shumë të përqendruar për zhvillimin dhe rezultatin që treguam sot.”
“Jam i lumtur me të gjithë golat. Golat më të thjeshtë janë më të mirët. Kemi krijuar sot aq shumë shanse dhe uroj ekipin por sidomos sulmuesit që shënuan sot. Kemi punuar mbi finalizimin, kemi vuajtur disa herë që nuk kemi qenë efektivë, por sot treguam një pamje të mirë dhe sot ishte e shkëlqyer. U kam thënë lojtarëve që kur jemi të aftë të shënojmë mesatarisht 3 gola në ndeshje, do të jemi të lumtur. Kanë filluar të besojnë në këtë dhe më vjen mirë”, – ka përfunduar trajneri i Vllaznisë, Tomas Brdariç.
“Gabuam shumë në fazën mbrojtëse, – ka thënë trajneri i Dinamos, Blendi Shkëmbi. – E nisëm mirë shënuam gol, nuk ishim të përqendruar. Në futboll kur fillon të ecë tersi sepse e kam provuar edhe vetë në fushë, kur skuadra që provon të riniset është e vështirë që ta kthesh. Të gjithë lojtarët janë njësoj, paguhen për të luajtur, nuk kanë rëndësi të quhen kështu mungesat. Ne i dinim cilësitë e Vllaznisë, u munduam të merrnim masat tona gjithçka shkoi keq. Duhet të kisha bërë diçka ndryshe. Përgjegjësitë janë të miat dhe të stafit, lojtarët u munduan që të bënin më të mirën.”
“Ato zëvendësime i bëra kur ishim në disavantazh, Mihana kishte presionin e kundërshtarit, po mendoja që të luaja për gjithçka që ta fitoja ose ta humbisja ndeshjen, – ka vijuar korçari i stolit të kryeqytetasve. – Unë kur them që marrë përgjegjësitë e them me sinqeritet, ka disa lojtarë që sot duhet të merrnin ekipin përdore si sot që ishim në momente të vështira. Unë deri në janar dua që t’i marr maksimumin kësaj skuadre, pastaj deri në janar nuk e di, por është e pakëndshme që të mendojmë për merkaton e janarit tani”, – përfundoi Bledi Shkëmbi.
