Botërori ynë “Rusia 2018”, të paktën edhe pas shortit të hedhur të shtunën në Shën Pjetërburg, është i ëmbël financiarisht për Federatën Shqiptare të Futbollit, e cila do të fitojë me të drejtën televizive ndaj Spanjës e Italisë, dy nga superfuqitë evropiane e botërore, por është i kripur në gogla. Sepse na ka vënë përballë dy ekipeve që janë fitues të kampionateve evropiane e botërore.
Por mbi të gjitha na ka vënë përballë dy skuadrave që shqiptarët i presin me shumë kënaqësi, sepse ka tifozë. Kështu ka pranuar dhe trajneri i kombëtares sonë Xhani De Biazi në një koment të shpejtë për teleteksin e RAI-t. “Në Shqipëri ka shumë tifozë të Italisë e do të jetë një derbi”, – ka thënë ai shkurtimisht. Madje ka dhe një gjë për t’u nënvizuar.
Tashmë nuk jemi më si më 1986, atëherë shihnim vetëm Barcelonën përballë Flamurtarit, apo tek-tuk ndonjë përballje në finalet e Kupave të Evropës, apo dhe veprimtaritë e mëdha për të bërë analiza thjesht nga specialistët. Sot të gjithë e dinë se si luan Spanja dhe Italia e mund të të japin mend për t’u përballur denjësisht me to. E megjithatë është përsëri short i kripur.
Por ajo që habit është fakti i ngutjes së Blaterit për ta hedhur këtë short, gjë që nuk ka ndodhur asnjëherë pa mbaruar kualifikueset e Kampionatit Evropian. Ndoshta nisur dhe nga hetimet që ka nisur FBI-ja, ku tashmë disa zyrtarë të FIFA-s janë dhe të arrestuar e gati për t’u ekstraduar drejt Amerikës për hetime të tjera, Blater ka dashur ta mbrojë kështu “Rusinë 2018”.
Por i gjithë ky short prish dhe strukturën e ndeshjeve miqësore. Aq më shumë që Italia e Spanja, dy kundërshtarët tanë të luksit, do të jenë përballë njëra-tjetrës më 24 mars në një miqësore në prag të Evropianit. Sepse askush prej tyre ndoshta nuk e kishte parashikuar që do të hidhej shorti kaq shpejt… Si rrjedhojë e dëshirës së çmendur të Blaterit.
E shorti u hodh, por të gjithë kanë pranuar që mendojnë vetëm pas Evropianit. Kështu duhet të ndodh dhe me tanët, të cilët me një përllogaritje të thjeshtë dhe në këtë grup ferri sërisht do të jenë të tretët. Shkurt Botëror i ëmbël financiarisht, por i kripur në gogla dhe për herë të parë me përballje gjigantësh ndaj Spanjës dhe Italisë.
