ASNN – Botërori në formatin aktual zhvillohet me 32 skuadra pjesëmarrëse. Por pas katër vitesh çdo gjë mund të ndryshojë. Dihet që vendimi për ta bërë Botërorin me 48 skuadra duke nisur nga viti 2026 është marrë prej disa muajsh, por FIFA është duke biseduar me autoritetet e Katarit për zhvillimin e Botërorit të vitit 2022 me formatin e ri, pra një Botëror me 48 skuadra.
Nuk është aspak fantazi, pasi Katari ka punuar mirë dhe ka ndërtuar impiante madhështore futbolli. Nga ana tjetër, Botërori është projektuar të luhet në dimër, kur temperaturat të jnë të moderuara dhe jo ekstreme si në verë dhe së fundmi, autoritetet arabe të Katarit nuk e kanë përjashtuar mundësinë të presin një turneu me 48 ekipe pjesëmarrëse.
Kjo do të thotë një shans më shumë për skuadrat vogla e ndër to dhe Shqipërinë. Lajmin e dha vetë presidenti i FIFA-s, Xhani Infantino, i cili ishte i ftuar në kongresin e Konfederatës Aziatike të Futbollit . Prej atje, Infantino deklaroi se shtimi i skuadrave nga 32 në 48 në Kupën e Botës mund të bëhet që në “Katar 2022”. “Sigurisht, është e mundur përse jo”, – u shpreh Infantino.
“Ne si FIFA po diskutojmë me miqtë tanë në Katar dhe shpresojmë që kjo mund të ndodhë, – ka vijuar kreu i organizmit që qeveris futbollin botëror. – Por nëse përgjigja do të jetë negative do të na mbetet ndjeësia që e provuam. Duhet të kërkojmë gjithmonë t’i bëjmë gjërat në mënyrën më të mirë të mundshme. Megjithatë, gjithçka do të vendoset përpara startit të Eliminatoreve, në fillim të vitit 2019.”
Zgjerimi i Botërorit është një ogur mjaft i mirë për përfaqësueset e vendeve të vogla, si Shqipëria, të cilat do të kenë më tepër mundësi të kualifikoheshin për në fazën finale të një turneu me 48 skuadra kundrejt atij aktual, me 32 skuadra. Një gjë e tillë u dëshmua edhe kur Shqipëria u kualifikua, për herë të parë dhe të vetme, për në fazën finale të Evropianit të 2016-ës në Francë.
