ASNN – Kalendari i plotë i Botërorit “Katar 2022”, nis më 21 nëntor dhe mbyllet më 18 dhjetor, janë vetëm 6 ditë pushimi. Botërori “Katar 2022” ka hedhur të premten shortin e fazës së grupeve dhe ndonëse kanë mbetur ende 3 enigma për t’u zgjedhur, janë përvijuar edhe betejat kryesore. Kështu, në grupin A, ndodhet vendi organizator, Katari, por edhe Senegali, Holanda dhe Ekuadori, në grupin B, Anglia, Shtetet e Bashkuara, Irani dhe fituesja e “play-off”-it evropian, pra, Skocia, Ukraina ose Uellsi, kurse në grupin C, Argjentina sfidohet nga Meksika, Polonia dhe Arabia Saudite.
Në grupin D, kampionia në fuqi e botës, Franca, do të ndeshet me Danimarkën, Tunizinë dhe fituesen e “play-off”-it midis Azisë, pra Australinë ose Emiratet e Bashkuara Arabe, dhe Amerikës Latine, pra Perusë. Në grupin E janë Spanja, Gjermania, Japonia, por edhe nga fituesja e “play-off”-it midis CONCACAF-it dhe Oqeanisë, pra Kosta Rika ose Zelanda e Re, në grupin F Belgjika, finalistja e mundur e 2018-ës, Kroacia, Maroku dhe Kanadaja, ndërsa në grupin G, Brazili, Zvicra, Serbia dhe Kameruni, dhe, në grupin H, Portugalia, Uruguaji, Koreja e Jugut dhe Gana.
Duhet theksuar se, duke qenë se është i pari Botëror që mbahet në dimër, çka ka pështjelluar kalendarin e futbollit anembanë planetit e sidomos në Evropë, “Katar 2022” do të luhet me një kalendar të ngjeshur, teksa gjithçka nis të hënën e 21 nëntorit dhe mbyllet të dielën e 18 dhjetorit. Kështu, faza e grupeve zgjat vetëm 12 ditë, nga 21 nëntori, deri më 2 dhjetor 2022 dhe gjatë saj do të luhen gjithsej 48 ndeshje, nga 4 ndeshje në ditë, duke nisur me grupet A dhe B, e duke vijuar deri tek grupet G dhe H, për të rinisur edhe një herë nga fillimi.
Duke plotësuar kështu ciklin e 3 ndeshjeve për çdo skuadër, dhe në total 6 ndeshje për secilin nga 8 grupet. Me mbylljen e fazës së grupeve, nisin menjëherë takimet e turit të 16-shes, që zgjatin 4 ditë, nga data 3, deri më 6 dhjetor, dhe do të luhet dy ndeshje çdo ditë. E mërkura dhe e enjtja e 7 dhe 8 dhjetorit do të jetë pushim, për t’u lënë radhën dy ditëve të takimeve çerekfinale, që do të luhen nga dy në secilën ditë, e më pas vijojnë dy ditë të tjera pushim, e diela dhe e hëna e 11 dhe 12 dhjetorit 2022.
Pas tyre, më 13 dhe 14 luhet dy takimet gjysmëfinale, nga njëra për secilën ditë, që pasohen nga dy ditë të tjera pushim dhe më 17 dhjetor luhet duelin për vendin e 3-të dhe të 4-t, kursa më 18 dhjetor 2022, finalja e madhe. Siç dihet, Botërori “Katar 2022” do të sillet për sportdashësit drejtpërdrejt nga Rrjeti i Radio-Televizionit Shqiptar.
