ASNN – Botërori “Katar 2022” do të jetë më i shtrenjti në histori. FIFA ka vendosur të shpenzojë 440 milionë dollarë për shpëblimet e futbollistëve gjatë gjithë turneut të futbollit. Një lojtar pjesëmarrës në këtë Botëror do të përfitojë maksimumi 370 mijë dollarë amerikanë. Ndërsa skuadra që do të marrë trofeun do të marrë si shpërblim 42 milionë dollarë. Edhe pak ditë kanë mbetur nga nisja e Kupës së Botës 2022, kur të dielën, më 20 nëntor në orën 17:00, Katari do të përballet me Ekuadorin në ndeshjen hapëse.
Futbollistët do të jenë personazhet kryesorë të këtij Botërori jo vetëm për paraqitjet e tyre në fushë por edhe për përfitimet që do të marrin në përfundim të kësaj veprimtarie. Organizmi që qeveris futbollin botëror ka njoftuar se do të shpërndajë më shumë se 200 milionë dollarë për klubet që u japin leje lojtarëve për të marrë pjesë në këtë turne. Si kurrë më parë, në total, FIFA në Katar do të shpërndajë 440 milionë dollarë, me maksimumi 370 mijë dollarë të paguar për çdo lojtar. Përveç kësaj, të gjitha klubet, lojtarët e të cilëve morën pjesë gjatë dy viteve të fundit në ndeshjet eliminatore, do të marrin shpërblim.
Fituesit e Botërorit do të marrin deri në 42 milionë dollarë. Kjo është shifra më e lartë që do të marrë një Federatë fituese. Edicionin e fundit, në 2018, Franca, “kampione bote”, përfitoi 38 milionë dollarë. Nënkampionët e botës në Katar përfitojnë 30 milionë dollarë. Skuadra e vendit të 3-të, 27 milionë, dhe vendi i 4-t, 25 milionë dollarë. Ekipet e renditura nga vendi i 5-të në të 8-tin marrin 17 milionë dollarë secili, 68 milionë dollarë gjithsej. Ekipet e renditura nga vindi i 9-të deri në të 16-tin, 13 milionë dollarë secili, 104 milionë dollarë gjithsej dhe ekipet nga vendi i 17-të në vendin e 32-të, 9 milionë dollarë secili, 144 milionë dollarë gjithsej.
FIFA ka sqaruar se shuma prej 10,000 dollarë në ditë do të shumëzohet me numrin e ditëve që çdo lojtar qëndron në këtë Botëror, duke filluar dy javë para ndeshjes hapëse dhe duke përfunduar një ditë pas ndeshjes së fundit të kombëtares së tij. Shuma e përgjithshme më pas do t’u shpërndahet klubeve me të cilat lojtari është i regjistruar gjatë dy viteve të fundit para Botërorit.
