ASNN – Nga 32 ekipet përfaqësuese të kualifikuara për në fazën finale të Botërorit “Katar 2022”, Gjermania është “më e lodhura”. Kjo do të thotë se 26 lojtarët e grumbulluar nga trajneri Hansi Flik kanë gjithsej 25,276 minuta në këmbë. Por edhe Anglia, Franca e Brazili nuk janë më mirë. Një Kampionat Botëror i Futbollit i veçantë ky i Katarit, unik. Të paktën tani për tani. Sepse luhet në dimër dhe rrjedhimisht në mes të angazhimeve që kanë futbollistët me klubet përkatëse.

Zakonisht kalojnë disa javë ose të paktën 19 ditë, mes ndeshjes së fundit të sezonit dhe ndeshjes së parë të Kupës së Botës. Këtë vit është ndryshe. Mbrëmjen e së dielës kampionatet e ligave të ndryshme ishin ende aktive, që do të thotë se jo vetëm është ulur periudha e pushimit në këtë rast vetëm 7 ditë, 12 më pak, por është rritur numri i lojtarëve që kanë shumë minuta në këmbë përpara nisjes së Botërorit dhe kjo mund të ndikojë në spektaklin dhe rezultatin e ndeshjeve.

Gjermania është skuadra që vjen në Botërorin e Katarit me numrin më të madh të lojtarëve të sfilitur. Skuadra prej 26 lojtarësh e trajnerit Flik ka luajtur gjithsej deri tani 25,276 minuta. E ndjek Anglia, me 25,077 minuta dhe më pas vijnë me radhë, Franca me 23,429, Brazili me 20,532, Spanja me 20,432, Portugalia me 18,554 dhe Argjentina me 17,666. Pra ka një diferencë prej 7610 minutash mes Gjermanisë dhe Argjentinës, dy prej favoritëve për titull.

Ndoshta nuk është rastësi që disa lojtarë janë menaxhuar kohët e fundit me kohën e tyre të aktivizimit. Kështu Kimih, 27 vjeç ka luajtur 1975 minuta, ndërsa Myler, 33 vjeç është aktivizuar vetëm për 969. E megjithëse ka kaq pak minuta në këmbë, sulmuesi i Bajernit të Mynihut nuk është vënë asnjëherë në dyshim për pjesëmarrjen e tij në botëror. Mbi të gjitha, që ky në Katar është tepër i veçantë.