ASNN – Tunizia po përgatitet për Botërorin gjatë muajit të shenjtë të Ramazanit. Trajneri i saj, Nabil Ma’alul thotë se ekipi po punon për t’iu përshtatur së bashku agjërimit dhe stërvitjes. Ai u ka kërkuar lojtarëve që të bëjnë sa më shumë kujdes në stërvitje që të mos pësojnë ndonjë dëmtim, i cili do t’i bëjnë që të thyejnë agjërimin. “Në skuadër kemi shumë lojtarë që mbajnë agjërim”, – ka pohuar ai.
“Megjithëse kemi ditë që përgatitemi ndeshjen e parë nuk luajtëm mirë, sidomos Mouezi, – ka vijuar ai. – Unë I thashë që të mos hynte në fushë, sepse kishte të tjerë më të gatshëm por ai nuk më dëgjoi, ndaj u detyrua që të ndërhynte stafi mjekësor. Lojtarët kanë të drejtë të agjërojnë, sepse është feja jonë. Por është e vështirë për të qëndruar 16 orë pa pirë ujë, sidomos kur kemi dy seanca stërvitore.
“Sidoqoftë, ne po përshtatemi, – ka pohuar trajneri i Tunizisë. – Problemi kryesor nuk qëndron te Ramazani, sepse djemtë janë mësuar me të, por te muskujt që pas një kampionati të gjatë me klubet, muskujt e futbollistëve furnizohen më pak me energji.” Ndërkohë, sulmuesi i përfaqësueses së Tunizisë, Uahbi Hazri, beson se skuadra e tij po bën mjaft mirë.
Duke parë paraqitjet ndaj miqësoreve me Portugalinë dhe Turqinë, ai shpreson në ecurinë pozitive edhe në Botëror. “32 skuadrat që janë në Botëror, sigurisht që janë më të mirat, – ka thënë ai. – Por ne kemi luajtur mirë me Portugalinë dhe Turqinë. E besoj se edhe ndaj Spanjës do të japim më të mirën. Këto teste na ndihmojnë për të parë se ku jemi, ku i kemi dobësitë.”
“Nuk mund të presim t’i rregullojmë në 18 qershor, kur përballë do të kemi Anglinë” – përfundoi Kazri. Ndërsa portieri i përfaqësueses, Mouez Hasen, thekson se ata do të japin gjithçka për të përfaqësuar me dinjitet Tunizinë në Botërorin e Rusisë. “Ne duam të fitojmë dhe për këtë do të japim gjithçka, për ta përfaqësuar Tunizinë, sa më denjësisht në Botëror”, – ka thënë ai.
“Ne po punojmë në stërvitje edhe pse na shqetësojnë ato që thuhen për ne jashtë fushës stërvitore. Jemi gati për të nisur aventurën në botëror” – përfundoi gardiani i portës tuniziane, Hasen.
