ASNN – Trajneri spanjoll përgatit skuadrën për vështirësitë e “Rusi 2018”, afrikanët, “të lumtur” me humbjen. Spanja vuajti për të korrur një fitore 1-0 ndaj Tunizisë në një miqësore të fundit para Botërorit, të zhvilluar në Krasnodar. Për trajnerin Zhylen Lopetegi, kjo ndeshje ishte banko-prova më e mirë për Botërorin rus. “Mendoj se skuadra ka arritur t’i kapërcejë vështirësitë dhe të rritet”, – ka thënë ai.
“Mendoj se kemi fituar një ndeshje të vështirë ndaj një rivali që nuk njihet humbje prej 9 ndeshjesh, – ka vijuar Lopetegi. – Unë këmbëngul tek fakti që çdo ndeshje në Botëror do të jetë si kjo. Nuk mendoj se është keq të mësohesh me këto vështirësi dhe me atë që pritet realisht në një Kampionat Botëror. Asnjë skuadër nuk do të fitojë në Botëror 3-0 apo 4-0. Kjo nuk ka për të ndodhur, ose do të ndodhë shumë rrallë.”)
Tanimë kampionët e botës e kanë hedhur vështrimin tek derbi iberik me Portgualinë më 15 qershor. “Është shumë e rëndësishme që ta fitojmë ndeshjen e parë, – thotë futbollisti i përfaqësueses spanjolle, Koke. – Në fund, kjo është ndeshja që përkufizon grupin dhe duam ta fitojmë atë e të jemi më të qetë në vijim të asaj faze.” Spanja arriti të shënojë vetëm 7 minuta para fundit, me anë të Aspas.
Por trajneri tunizian, Nail Ma’aluli ishte i kënaqur përtej humbjes. “Mendoj që është një humbje shumë dinjitoze përballë një skuadre përfaqësueseje të Spanjës që është një nga më të mirat në botë. Ne nuk e merituam humbjen, sepse patëm 3 mundësi të mira për shënim, por nuk i shfrytëzuam ato, sidomos në pjesën e parë, në dy raste me Naim Slitinë. Por unë jam shumë, shumë i lumtur me lojën, pavarsisht humbjes.”
Spanja e nis grupin B me përballjen me fqinjët, kampionë në fuqi të Evropës, ndërsa Tunizia sfidon Anglinë në grupin G.
