ASNN – Vllaznia është shpallur “kampione” e Shqipërisë në boks për të 20-tën herë, ndërsa Anxhelo Merkohasani i Tiranës është shpallur boksieri më i mirë i Kampionatit Kombëtar të Të Rriturve, që për tre ditë mbushi plot Pallatin e Sportit “Qazim Dervishi” në Shkodër.

Të dielën në mbrëmje është mbyllur Kampionatit Kombëtar të Të Rriturve në Boks dhe Vllaznia e Shkodrës është shpallur kampione e Shqipërisë në boks për vitin 2015. Kurorëzimi i kuqebluve vendas është bërë në Pallatin e sportit “Qazim Dervishi” të Shkodrës në një atmosfere shumë festive dhe sportive.

Djemtë e talentuar të boksit shkodrane, të drejtuar nga trajneri i tyre, Zef Gjoni, bënë realitet kurorëzimin që kishin premtuar ditë më parë. Titulli i sivjetem është jubilar, pasi ishte i 20-ti që sportistët kuqeblu e arrijnë në 24 kampionate të boksit të rilindur pas viteve 90-të.

Bazuar në sistemin e pikëzimit, Vllaznia grumbulloi 26 pikë përkundër 21 të Tiranës duke lënë në vend të trete Teutën me 13 pikë. Në ceremoninë e organizuar në mbyllje të veprimtaritë, krahas ekipit “kampion” Vllaznia dhe boksierit më të mirë, Anxhelo Merkohasani, u nderuan me kupa personale edhe Klevis Vrapi i Teutes si boksieri më teknik, Arjon Kajoshi i Vllaznisë, si boksieri i perspektives dhe Taulant Zajmi i Dinamos, si boksieri më luftarak.