ASNN – Kampionati i të rriturve në boks, që është duke u zhvilluar në sallën sportive “Farie Hoti”, dje ka zhvilluar ditën e dytë, ndërsa Tirana e Vllaznia jo vetëm që janë pranë titullit kampion, por sot zgjidhin gjithçka mes tyre. Në ditën e dytë kanë spikatur ndeshjet e peshës 64 kg, 69 kg, 75 kg dhe 91 kg, të cilat kanë sjellë dhe spektakël për të pranishmit.

Në përgjithësi është duke u zhvilluar një kampionat i bukur dhe me shumë rivalitet. Ashtu si një ditë më parë, edhe dje kampionati kombëtar i boksit për të rritur pati emocione, ku mjaft duele u mbyllën me rezultate të ngushta. Boksieri Llambi Lamaji i Apolonisë kualifikohet i pari në finalet e sotme, pasi triumfon në ring në peshën 60 kg me rezultatin e pastër 3-0 ndaj Lorenc Malajt të Albës.

Një tjetër boksier nën logon e klubit fierak Arnold Kuqari del fitues ndaj Kristjan Çurrit të Besëlidhjes pas KO-së. Ndërkohë në peshën 69 kg Denis Nurja i Tiranës, pas një dueli të fortë, neutralizon Xhulio Vrenozin e Apolonisë 2-1. Pesha e fundit +91 kg u mbyll me fitoren e Nelson Hysën të Vllaznisë me “nokaut” teknik. Kampionati ul sot siparin me 10 finale, ku në garë mbeten dy rivalët historikë të ringut në vend Vllaznia kampione në fuqi dhe Tirana.

Rezultatet e ditës së dytë të kampionatit të boksit

Pesha 60 kg  Lamaj (Apolonia) – Malaj (Alba)                 Fiton Lamaj

Pesha 64 kg  Curri (Besëlidhja) – Kuqari (Apolonia)      Fiton Kuqari

Pesha 64 kg  Shytani (Vllaznia) – Methasani (Tirana)   Fiton Shytani

Pesha 69 kg  Vrenozi (Apolonia) – Nurja (Tirana)          Fiton Nurja

Pesha 75 kg  Mërtiri (Apolonia) – Herceku (Teuta)         Fiton Herceku

Pesha 75 kg  Beqiri (Tirana) – Çekini (Vllaznia)             Fiton Beqiri

Pesha 81 kg  Marashi (Partizani) – Barmeta (Tirana)     Fiton Barmeta

Pesha 91 kg  Rama (Tirana) – Dema (Vllaznia)              Fiton Dema

Pesha 91 kg  Sallaku (Apolonia) Xhediku (Partizani)   Fiton Xhediku

Pesha +91 kg           Paluca (Arena) Hysa (Vllaznia)    Fiton Hysa