Federata Shqiptare e Boksit tashmë është edhe me zëvendëspresident të ri. Dhe ky është biznesmeni, Mirsad Uruçi, ndërsa kështu ka vendosur Komiteti Ekzekutiv i Federatës Shqiptare të Boksit në mbledhjen e saj të radhës, e cila sipas drejtorit teknik Mirgen Pero është zhvilluar dje.

Në fjalën e tij përshëndetëse Uruçi shprehu angazhimin e tij për të bërë më të mirën për boksin shqiptar, ndërsa ka deklaruar: “Ndihem i nderuar për detyrën e re dhe për besimin që më kanë dhënë. Nuk do ta kisha pranuar si detyrë nëse nuk do të shihja impulsin pozitiv nga Komiteti Ekzekutiv.”

“Ndjej kënaqësi dhe detyrim moral që të kontribuoj për këtë sport dhe uroj që nismat e projektet e reja t’i çojmë më përpara së bashku, – ka vijuar më tej nr. 2 i organizmit që qeveris boksin shqiptar. – Unë shpreh gatishmërinë time maksimale për të mbështetur si burim njerëzor si ekonomik, ashtu dhe teknik për të mirën e boksit shqiptar.”

Kësisoj dyshja Kalivopulli-Uruçi në krye të boksit shqiptar pritet të bëjnë gjëra pozitive, të cilat praktikisht duhet të nisin që nga Kupa e Shqipërisë, që do të mbahet të premten në Durrës.