ASNN – Krenar Zeneli eliminohet mes polemikave, Rexhildo Zeneli pret turnetë e tjerë kualifikues për “Tokio 2020”. Epidemia e koronavirusit që ka shpërthyer në shkallë globale, ka çuar edhe në pezullimin e Evropianit të Boksit. Në të kanë marrë edhe dy boksierë shqiptarë dhe Krenar Zeneli është eliminuar mes polemikave, kur Rexhildo Zeneli pret tanimë turnetë e tjerë kualifikues për “Tokio 2020”.
Koronavirusi pezullon edhe Kampionatin Evropian të boksit në Londër, që ishte njëkohësisht turne kualifikues për në Lojërat Olimpike “Tokio 2020”. Task Forca e Komitetit Olimpik Ndërkombëtar ka shpjeguar se do ta vlerësojë në mënyrë të përditshme situatën për të plotësuar shpërndarjen e vendeve dhe të kuotave të boksit për Lojërat Olimpike “Tokio 2020”.
Që do të thotë se mes majit dhe qershorit do të jenë turnetë plotësues. Në këtë kampionat Evropian nga Shqipëria kanë qenë Krenar Zeneli (pesha 52-57 kilogram) dhe Rexhildo Zeneli (pesha 57-63 kilogram), të cilët, në fakt, kanë shkuar me shpenzimet e tyre. Aq më tepër që janë ndihmuar nga kombëtarja e Kosovës për të pasur një trajner.
Kjo, sepse pamundësia financiare, krijuar nga mosçelja e fondit grant, bëri që “dorezat” shqiptare të mos ishin me delegacion të plotë. Sidoqoftë, paraqitja e Krenar Zenelit dhe Rexhildo Zenelit ka qenë mbresëlënëse. Në ndeshjen e parë Krenar Zeneli ka mundur moldavin Dorin Bucsa 2-1, ndërkohë që në mënyrë të padrejtë, në një ndeshje të dominuar prej tij, është eliminuar nga gjyqtarët në përballjen me spanjollin Hoze Kueroz.
Rexhildo Zeneli ka fituar me belgun Abdelkarin 3-0 dhe prêt turnetë e tjerë kualifikues për të arritur pikët për kualifikimin për në Lojërat Olimpike “Tokio 2020” duke qenë shumë pranë. Tanimë shqetësimi kryesor i Federatës Shqiptare të Boksit është kthimi i Krenar dhe Rexhildo Zenelit në Shqipëri, aq më tepër që nga e marta e 16 marsit, ora 23:59, janë pezulluar fluturimet vajtje-ardhje me Britaninë e Madhe për shkak të koronavirusit.
