Që në fillim presidenti i Federatës Shqiptare të Boksit, Florend Kalivopuli, ka pranuar se në këtë asamble kanë qenë të pranishëm ata që bëjnë boksin në Shqipëri. “Sepse ata që mungojnë janë ekipe inekzistente, ndërsa këtu është pjesa bio, apo ata që janë 100 % pjesë e boksit shqiptar, – ka theksuar ai. – Do të mundohemi që ta shtojmë realisht këtë sport, sepse ka dhe tërheqje, pa thënë që duhet ta vendosim në rregulla loje, pasi gjatë vitit 2015 kemi pasur dhe probleme.”

“Unë do ta bëja analizën e këtij viti në katër pika; veprimtaritë kombëtare dhe ndërkombëtare të vitit 2015, demokratizimi i federatës, integrimi i boksit, si dhe raporti financiar”, – ka shtuar ai. Dhe Kalivopuli menjëherë ka hyrë në temë: “Ne kemi pasur zgjedhje për president me dy raunde dhe për fat ato përfunduan. Fati jonë i mirë ishte që presidenti Leqejza nuk e futi Federatën në kaos, apo në kolaps.”

“Sepse po të ishte dashakeqës mund ta kishte bërë një hap të tillë dhe ne sot do të ishim nëpër gjyqe, – ka pohuar kreu i dorezave shqiptare. – Por ai diti ta mbante procesin zgjedhor në mënyrë korrekte dhe në fund më dha dorën si fitues. Zgjodhëm edhe një Komitet Ekzekutiv sa më gjithëpërfshirës, ndonëse më pak e përfaqësuar është Tirana.”

“Megjithatë me këtë Komitet Drejtues gjithëpërfshirës mendoj se do të bëjmë më të mirën për boksin. Kemi bërë një mbledhje në muaj dhe mbi bazën e “grant”-it do të bëjmë dhe veprimtaritë kombëtare të boksit të parashikuara në kalendar”, – ka përfunduar Kalivopuli, kurse më pas ka pasur debate të mëdha për çështje të caktuara. Por që në fund të gjithë janë ndarë paqësisht.