ASNN – Kryebashkiaku i Tiranës, Lulzim Basha, ka pritur Jurgen Uldedaj, boksierin që fitoi medaljen e bronztë në Kampionatin Evropian për Të Rinj, që u zhvillua në Kroaci. Më pas medalisti shqiptar është pritur edhe nga Presidenti i KOKSH-it, Viron Bezhani. Pasi ka marrë një titull mirënjohje, Uldedaj i është gëzuar premtimit se shumë shpejt do të fillojë përgatitjet për në Olimpiadë, duke u stërvitur në Francë.
Jurgen Uldedaj, boksieri shqiptar që arriti të ngjitet në podiumin e nderit në Kampionatin Evropian për Të Rinj në Boks, që u zhvillua në Kroaci, është pritur nga Kryetari i Bashkisë së Tiranës, Lulzim Basha. Duke e përgëzuar boksierin Uldedaj i cili është dhe sportist i klubit “Tirana”, kreu i Bashkisë shprehu kënaqësinë për përfaqësimin dinjitoz që sportistët e klubit “Tirana” po i bëjnë Shqipërisë në veprimtaritë ndërkombëtare.
Basha ka premtuar dhënien e një shpërblimi për boksierin Uldedaj dhe një kujdes të veçantë nga Bashkia, në mënyrë që të vazhdojë të përfaqësojë me dinjitet Shqipërinë edhe në veprimtarinë e ardhshëm e të fitojë medaljen e artë. Jurgen Uldedaj ka fituar medaljen e bronzit në peshën deri në 81 kilogramë, pas sfidës së fituar me polakun Maciej Zurakovski.
Në mbledhjen e ardhshme të Këshillit Bashkiak e cila është e para pas zhbllokimit të buxhetit, kryebashkiaku Basha ka propozuar dhënien e shpërblimit edhe për sportistët e tjerë të klubit “Tirana” që kanë marrë medalje në kompeticionet ndërkombëtare. Bashkia e Tiranës, – tha z. Basha do të bëjë gjithçka që varet prej saj, për të mundësuar ecurinë pozitive të sportistëve të klubit “Tirana”.
Më pas, medalisti i boksit shqiptar është pritur edhe nga Presidenti i KOKSH-it, Viron Bezhani, i cili ka dhënë një titull mirënjohje sportistit shqiptar. Bezhani ka deklaruar gjithashtu përpara mediave se për Jurgenin po bëhen të gjitha përpjekjet nga KOKSH-i për të kryer stërvitjen në Francë. Synimi i ardhshëm i Jurgen Uldedajt është, pjesëmarrja në Olimpiadën e Rios dhe sigurisht, ngjitja në podiumin e nderit.
