Jurgen Uldedaj, boksieri i peshës 81 kg, nuk ka shkuar më shumë se sa medalja e bronztë në Kampionatin Evropian të Të Rinjve, që përfundon sot në Zagreb. Përtej pritshmërive, ndonëse Uldedaj sjell të dytën medalje të bronztë nga Evropiani i moshave, një vit më parë e ka bërë një gjë të tillë për moshat 15-16 vjeç, boksieri i bardhebluve nuk ka mundur ta kalojë dot në gjysmëfinale norvegjezin Tregren Vegar, i cili ka fituar me pikë teknike 3-0.

Në pikë raundesh, të dhëna prej gjyqtarëve anësorë rusi Sezgei Zherkin, gjeorgjiani Zurab Tibija dhe francezi Sevge Hermosila, pikët kanë qenë të ngushta në favor të norvegjezit. 28-29, 28-29, 27-29. “Megjithatë, – thotë trajneri i tij nga Tirana, Sead Bushati, – është për herë të parë në të gjithë historinë e boksit shqiptar një gjysmëfinalist në Evropianin e të rinjve. Është sukses kjo arritje e Uldedajt, sikurse është sukses dhe marrja e medaljes së bronztë.”

“Për rrjedhojë Uldedaj është një boksier që edhe me të rriturit në çdo aktivitet ndërkombëtar do të sjelli medalje”, – ka vijuar ai. Ajo që duhet bërë e ditur është se në këtë Evropian, Krenar Zeneli dhe Erjon Muhja janë eliminuar në turin e dytë, kurse Rexhildo Zeneli ka mbërritur deri në 1/8 e finaleve. Përfundimisht boksi shqiptar nga Evropiani i Të Rinjve në Zagreb ka ardhur me medaljen e bronztë të Jurgen Uldedaj që gjithsesi nuk është pak…