ASNN – Jurgen Uldedaj ka fituar një tjetër medalje në aktivitetit ndërkombëtare. Boksieri 17-vjeçar është renditur i treti në Evropianin e të rinjve që u zhvillua në Zagreb. Jurgen Uldedaj ka fituar medaljen e bonztë në peshën deri në 81 kilogramë pas sfidës së fituar me polakun Maciej Zurakovski, por ai pretendon të marrë të artën në veprimtaritë e tjera.

Kështu, Uldedaj ka sjellë medaljen e bronztë pas konkurrimit në Kampionatin Evropian të Boksit për Nën-18-vjeçarët. Boksieri shqiptar ka marrë vlerësimet maksimale nga specialistët e këtij sporti, pas përfundimit të konkurrimit të tij në evropianin e zhvilluar në Kroaci. Paraqitjet e boksierit të ri shqiptar në veprimtaritë ndërkombëtare kanë qenë të jashtëzakonshme duke vijuar të jetë i pranishëm në podiumet e medaljeve.

Shqipëria ngjitet në podiumin e nderit në Evropianin e boksit për Nën-18-vjeçarët, të zhvilluar në Zagreb të Kroacisë. Në peshën 81 kg medalja e bronzit ka shkuar për boksierin e kombëtares tonë, Jurgen Uldedaj, i cili sërish ka përmbushur pritshmëritë për një vend nderi në këtë veprimtari, por ai deklaron se kjo nuk i mjafton. “Do të bëjmë më shumë përpjekje për të arritur objektivin për t’u shpallur, pse jo “kampion” i kontinentit”, – ka deklaruar ai.

Në gjysmëfinale 17-vjeçari Uldedaj ka humbur me 1 pikë diferencë 28-29 ndaj përfaqësuesit të Norvegjisë, duke humbur kështu medaljen e argjendit, ndërsa ka ndikuar edhe një dëmtim i lehtë që kishte patur në ndeshjen kualifikuese ndaj boksierit polak. Në Evropianin e zhvilluar në Zagreb ku merrnin pjesë 41 shtete, Shqipëria u përfaqësua me 4 sportistë.