ASNN – Me 5 medalje, dy ari dhe 3 argjendi, Shqipëria është shpallur fituese e Turneut Ndërkombëtar të Boksit, “Memorial Vllaznia 201”. Kjo veprimtari, që u zhvillua përgjatë dy ditëve të fundit në Pallatin e Sportit “Qazim Dervishi” në Shkodër, u organizua nga Federata Shqiptare e Boksit dhe Klubi Shumësportësh “Vllaznia”, spikati për faktin se në 6 nga 10 finalet e peshave trupore, konkurruan boksierët shqiptarë, të cilët triumfuan   në dy prej tyre.

Medalistët e artë janë Krenar Zeneli, në kategorinë e peshës deri në 56 kg, si dhe Rexhildo Zeneli, në atë të peshës deri në 60 kg. Ky i fundit u kurorëzua si sportisti më i mirë i turneut. “Ne arritëm që të rivalizojmë fuqishëm dhe falë punës tonë arritëm që të marrim plot 5 medalje, 2 ari dhe 3 argjendi, – ka deklaruar trajneri i kombëtares kuqezi të dorezave, Zef Gjoni. – Po ashtu fituam edhe vendin e parë si kombëtare dhe trofeun e boksierit më të mirë.”

“Të gjitha këto suksese tregojnë nivelin e lartë të boksierëve tanë, – ka vijuar ai më tej. – Shpresojmë që të vazhdojmë në këtë rrugë dhe tashmë të arrijmë medalje dhe suksese të tilla edhe në veprimtari të tjera evropiane dhe botërore. Jemi shumë të kënaqur qoftë me nivelin e boksierëve tanë, organizimin e “Sport Klub Vllaznia” dhe një falënderim edhe për tifozët e shumtë që e ndoqën këtë turne.”