Rexhildo Zeneli, të paktën edhe sipas presidentit të Federatës Shqiptare të Boksit, Florend Kalivopulli, është dënuar katër vjet për shkak të daljes pozitiv në analizat antidoping në Lojërat e Para Evropiane në Baku. “Është dënuar për shkak të përdorimit të lasiksit që gjashtë muaj përpara ishte vendosur në substancat e ndaluara e kjo për të rënë nga pesha”, – ka deklaruar ai.

“Megjithatë unë mendoj që fajtori më pa faj është Rexhildo Zeneli, – ka vijuar kreu i organizmit që qeveris boksin shqiptar. – Parë kështu, edhe duke e cilësuar si boksierin e perspektivës, ne i kemi kërkuar Federatës Botërore përpara dy javësh që ta apelojmë. Presim një përgjigje nga AIBA, sikurse ka edhe një insistim nga presidenti i KOKSH, Viron Bezhani, dhe sekretari i përgjithshëm Stavri Bello për zbutjen e këtij dënimi.”

“E rëndësishme është që ai nuk e ka ndërprerë boksin. Ne pretendojmë që ai të kthehet më i fortë, sepse ka bërë ndeshje spektakolare”, – ka thënë përfunduar presidenti i Federatës Shqiptare të Boksit, Florend Kalivopulli për Rexhildo Zenelin.