ASNN – Kampionati i 40-të kombëtar i Boksit ka nisur mes shumë emocioneve në sallën sportive “Farie Hoti” në Tiranë, atje ku në 13 ndeshje të luajtura në ring në pjesën më të madhe kanë dominuar boksierët e Tiranës dhe të Vllaznisë. Të dy këto skuadra kanë zhvilluar nga gjashtë ndeshje, atje ku bardheblutë kanë qenë absolut, ndërsa shkodranët kanë fituar tre. Më pas janë dalluar fierakët me dy ndeshje të fituara dhe Partizani me një të tillë.
Edhe kësaj here titulli kampion në boks për të rritur do të ndahet me shumë gjasa mes supremacisë së Vllaznisë dhe Tiranës. Kjo ka qenë panorama e ditës së parë e dueleve të zhvilluara në Sallën Sportive “Fahrie Hoti”. Në arenën kryeqytetase 14 sfidat çerekfinaliste mes boksierëve më të mirë të vendit mbajtën deri sekondën e fundit frymën për qindra të pranishëm. Përveç rivalitetit mes boksierëve në ring, për t’u përshëndetur në këtë edicion ishte “fair play”, i munguar në vitet e mëparshme.
Ndërkaq, notën maksimale meritoi në eliminatoret e djeshme edhe gjykimi, çka shmangu kontestimet mes boksierëve. I pari që festoi kualifikimin në gjysmëfinale ishte boksieri Agur Velaj i Apolonisë, pas fitores 2-0 ndaj boksierit të Vllaznisë Ardit Ago. Programi i garave vijoi me dy duele në peshën 60 kg, ku në gjysmëfinale kaluan Elsid Kalemi i Tiranës dhe Llambi Lamaj i Apolonisë. Ndërkohë Hysa e Laçi mbyllën mbrëmjen në favor të tyre në peshën +91 kg.
Kampionati rikthehet sot pasdite me 10 sfidat gjysmëfinaliste dhe të shtunën paradite me 8 finalet. Këtë kampionat marrin pjesë 11 klube të përfaqësuara në ring me 44 boksierë. Federata Shqiptare e Boksit kishte marrë të gjitha masat në mbarëvajtjen normale të aktivitetit më të rëndësishëm të vitit. Edhe policia ishte në krye të detyrës, e përshëndetur nga drejtuesit e FSHBo-së. E shndërruar në një “makth” për rivalët e saj, Vllaznia kërkon të ruajë fronin për të 20-n sezon radhazi në histori.
Por me pretendime është edhe Tirana. Aktiviteti më i rëndësishëm kombëtar i Federatës së Boksit pason në projektkalendarin e 2014-2015 kampionatin e Nën-18-vjeçarëve, të zhvilluar ditët e fundit në qytetin e Vlorës. Siç shihet kampionati është duke u udhëhequr nga Tirana, ndërsa sot do të zhvillohet ndeshjet e ditës së dytë në ora 17:00
Rezultatet teknike të ditës së parë
të Kampionatit Kombëtar të Boksit
Pesha 52 kg Velaj (Apolonia) – Ago (Vllaznia) Fiton Velaj
Pesha 60 kg Piranej (Vllaznia) – Kalemi (Tirana) Fiton Kalemi
Pesha 60 kg Lamaj (Apolonia) – Kaloti (Tomori) Fiton Lamaj
Pesha 64 kg Shytani (Vllaznia) – Cenaj (Teuta) Fiton Shytani
Pesha 64 kg Zllatiçani (Vlora) – Methasani (Tirana) Fiton Methasani
Pesha 69 kg Vasha (Vllaznia) – Nurja (Tirana) Fiton Nurja
Pesha 69 kg Sorra (Tirana) – Qerimi (Vlora) Fiton Sorra
Pesha 75 kg Beqiri (Tirana) – Xhafaj (Partizani) Fiton Beqiri
Pesha 81 kg Hodo (Teuta) – Kaçaj (Vllaznia) Fiton Kaçaj
Pesha 81 kg Marashi (Partizani) – Baçinozi (Apolonia) Fiton Marashi
Pesha 81 kg Budani (Vlora) – Barmeta (Tirana) Fiton Barmeta
Pesha 91 kg Froku (Vlora) – Hysa (Vllaznia) Fiton Hysa
Pesha 91 kg Derjai (Besa) – Laçi (Tirana) Fiton Laçi
