ASNN – Në Palestrën e Boksit “Bernard & Hasan” është zhvilluar Kampionati i 16-të Lokal i Boksit, një veprimtari tradicionale, që është ndjekur nga 300 pjesëmarrës. Në fakt boksi është një sport me tradita në Berat, ndaj dhe ky kampionat lokal mirëpritet çdo vit, sepse janë cilësi që më pas transferohen tek Tomori. Ky edicion ka mbledhur nxënësit e shkollave 9-vjeçare dhe të mesme, të cilët më pas seleksionohen nga kryetrajneri i Tomorit, Gentian Begaj.
Dhe me ndihmën e pakursyer të Drejtorisë Arsimore Rajonale të Beratit është mundësuar pjesëmarrja e nxënësve. Ndërkohë që nga Prefektura janë sponsorizuar kupat dhe medaljet, apo uniforma dhe shpërblime për fituesi. Sërish edhe këtë vit çdo gjë është bërë me sponsorizimin e Petrit Çobos dhe Kantinës së tij të verës. Në këtë veprimtari kanë qenë të pranishëm edhe boksierët e Tomorit, si dhe vajza, që e kanë bërë më të qetë praninë e shikuesve.
Ndeshjet janë gjykuar nga gjyqtarët e Federatës Shqiptare të Boksit, Konstandin Dundo dhe Marsel Olldashi. Dhe fituesit sipas peshave përkatëse janë: Lidio Sinjari 32 kg, Sabiano Gjata 34 kg, Learto Leko 36 kg, Bledar Mbrakulli 40 kg, Renaldo Polo 44 kg, Saleo Gjata 50 kg, Rezart Roli 54 kg, Gerald Dëngo 60 kg, Amarildo Koroni 63 kg, Glynis Buba 66 kg, Haxhi Kapllani 69 kg, Ledio Radeshi 70 kg, Elio Bode 75 kg, Renato Raga 80 kg.
“Kampione” është shpallur Shkolla e Mesme e Përgjithshme “Kristaq Capo” ndërsa kupën si boksieri më i mirë i kësaj veprimtarie e ka marrë Amarildo Kanani, ndërsa ai më teknik është shpallur Bledar Mbrakulli. Gentian Begaj për “Sport Ekspres” do të deklaronte: “Do të falënderoj të gjithë mbështetësit që bënë të mundur këtë veprimtari, por në të njëjtën kohë bëj një thirrje të veçantë si Bashkisë së qytetit dhe kryebashkiakut Petrit Sinaj që ta mbështesin këtë sport.”
“Madje i bëj thirrje edhe Federatës Shqiptare të Boksit për më shumë mbështetje financiare ndaj Tomorit. Berati është ndër rastet e rralla që bën kampionat lokal boksi”, – ka përfunduar kryetrajneri i Tomorit, Gentian Begaj.
