ASNN – Basketbollistët kuqeblu të Vllaznisë kanë zhgënjyer përsëri. Pas asaj që ndodhi në gjysmëfinalet e Kupës së Shqipërisë duke u eliminuar nga Tirana, zhgënjimi i dytë, në harkun kohor të vetëm pak ditëve, vjen tashmë për kampionat. Pikërisht në “Qazim Dervishi”, Kamza Basket, fituese e Kupës së Shqipërisë në Shkodër, i shkakton disfatën e dytë Vllaznisë “kampione” në fuqi duke bërë që në radhët e shkodranëve të ketë pesimizëm për të ardhmen e kësaj skuadre.

Në fakt dy pikët e para shënohen nga amerikani i Vllaznisë, Alen, por kundërpërgjigja vjen menjëherë nga Karaj, fillimisht me një trepikësh dhe një tjetër me vlerë dy pikësh që kthen epërsinë nga ana e skuadrës së tij. Për vendasit ka edhe një dy pikësh tjetër në këtë pjesë të parë ndërkohë që miqtë shkojnë në 22 pikë kundrejt 4 të Vllaznisë, shifra këto për t’u mbajtur mend për ekipin kuqeblu, që befasojnë jo pak të pranishmit në Pallatin e Sportit.

Pjesa e dytë vjen me një farë përmirësimi të skuadra shkodrane, teksa e fitojnë 17-16 duke shkuar në dhomat e zhveshjes me shifrat 21-38. Por kur pritej një gjysmë e dytë ndryshe për Vllazninë janë përsëri miqtë që diktojnë në fushën e lojës. Me një Karaj, më i miri në fushë me 25 pikë të shënuara, Kamza Basket merr edhe pjesën e tretë 12-15 duke e thelluar sërishmi epërsinë. Ka një farë përpjekje në pjesën e fundit nga ana e Vllaznisë që arrin ta fitojë atë 18-16.

Por vërshëllima përfundimtare e gjyqtarit të takimit, ndërkombëtarit Gentian Cici, fikson rezultatin e përgjithshëm 51-69 për miqtë nga Kamza.

Vllaznia – Kamza Basket   51-69

(4-22, 17-16, 12-15, 18-16)

Vllaznia: Berdica, Ndoja, Faslia, Xhokoviç, Alen / Gjonaj, Arra, Rrashketa, Bekteshi, Dod Lekndreaj, Shabani. Trajner: B. Gjeçaj

Kamza Basket: Karaj, Hamati, Shestani, Birçaj, Roshi / Fjolla, Oruçi, Roshi. Trajner: A. Muhametaj

Gjyqtarë: G. Cici, G. Hoxha (Tiranë), E. Hoxhaj (Vlorë)

Kampionati Kombëtar

i Basketbollit – Meshkuj

Superliga

Java e 11-të

(27 shkurt 2016)

Vllaznia – Kamza Basket   51-69

Tirana – Teuta                      76-66

Flamurtari – Partizani          78-61

Renditja

Nr.       Skuadra                     N.        F.         H.        Psh-Pp           Pikë

1. Kamza Basket 11        9          2        832-669         20
2. Tirana 11        9          2        862-735         20
3. Vllaznia             11        8          3        789-705         19
4. Teuta             11        4          7        804-819         15
5. Flamurtari             11        3          8        723-859         14

6.       Partizani                    11        0          11        637-760         11