ASNN – Juventusi është shpallur “kampion” për të pestën herë radhazi kur kanë mbetur edhe tri ndeshje për t’u luajtur në nivelin më të lartë të Kampionatit Italian të Futbollit, që njihet ndryshe si “Seria A”. Fitorja e Romës kundër Napolit bëri që bardhezinjtë të hapin shampanjën para kohe dhe festa të shpërthejë në qendrën e klubit në Vinovo.
Ashtu sikurse para dy vitesh kur Juve drejtohej nga trajneri Antonio Konte, ka qenë sërish Roma që i ka “dhuruar” titullin bardhezinjve. Nëse në vitin 20014, Roma luftonte për titullin dhe ndalej në Siçili nga Katania, kësaj radhe Roma i shuan të gjitha shpresat Napolit, si skuadra e vetme që po i bënte presion Juventusit.
As rikthimi i Gonzalo Higuain në fushën e blertë nuk e ndihmoi Napolin që të thyente Romën në Stadiumin “Olimpiko” të kryeqytetit, një skuadër e cila çon në 14 numrin e ndeshjeve pa humbje në kampionat. Mesfushori belg Nainggolan ishte ai që realizoi në minutën e 88-të.
Goli erdhi pikërisht, në kohën kur djemtë e trajnerit të napolitanëve, Sarri, po bënin më tepër presion për të marrë të tre pikët dhe për të mbajtur gjallë shpresat për titull. Tanimë, Napoli duhet të bëjë kujdes që të ruajë vendin e dytë, pasi Roma është afruar në vetëm dy pikë, ndërkohë që kanë mbetur edhe tre ndeshje.
