ASNN – Për herë të parë që prej vitit 1984, Holanda nuk do të jetë pjesëmarrëse në një Kampionat Evropian të Futbollit. Tulipanët janë mundur 2-3 nga Republika Çeke në ndeshjen e fundit të grupit A, duke u renditur në vendin e 4-t dhe automatikisht mbeten jashtë fazës finale të “Francë 2016”. Holanda është një nga ekipet e mëdha të futbollit evropian që nuk do të jetë në finalet e Francë 2016.
Skuadra e trajnerit Blind është mundur 2-3 nga Republika Çeke në “Amsterdam Arena”, në ndeshjen e fundit eliminatore të grupit A. Të ndodhur në pozita të vështira, përsa i përket renditjes, “tulipanët” synojnë gjithçka në sfidën përballë çekëve, si shansin e fundit për të kaluar të paktën në “play-off”. Por miqtë kalojnë në epërsi me anë të Kaderabek në minutën e 24-t.
Dyfishon shifrat Siral 11 minuta më vonë, ndërsa vulos praktikisht rezultatin Van Persi me një autogol, në minutën e 66-të. Me rezultatin 3-0 kundër skuadrës së tyre, tifozët holandezë braktisin stadiumin. Dy golat e shënuar nga Huntelari, në minutën e 70-të, dhe Van Persi, 13 minuta më pas, janë vetëm për statistikë. Deri më tani janë 20 skuadrat e kualifikuara për në fazën finale të Evropianit “Francë 2016”.
Ato janë Franca, Islanda, Republika Çeke, Turqia, Belgjika, Uellsi, Spanja, Sllovakia, Gjermania, Polonia, Anglia, Zvicra, Irlanda e Veriut, Rumania, Austria, Rusia, Italia, Kroacia, Portugalia dhe Shqipëria. Kuqezinjtë do të jenë në vazon e 4-t të shortit që do të hidhet në dhjetor. Ndërsa skuadrat që do të marrin pjesë në “play-off janë: Hungaria, Ukraina, Norvegjia, Danimarka, Suedia, Irlanda, Bosnjë-Hercegovina dhe Sllovenia.
Nga këto skuadra vetëm katër do të shkojnë në Euro 2016.
