ASNN – Formula 1 ka vendosur që të mos e zhvillojë garën për Çmimin e Madh të Rusisë në Botërorin e sezonit të ri, që pritet të nisë së shpejti. Ky vendim vjen pas bashkëbisedimit të Federatës Botëror të Automobilizmit (FIA) me të gjitha skuadrat që ndodhen në Barcelonë për testet para nisjes së kampionatit. Kështu, Çmimi i Madh i Rusisë në Formula 1 nuk do të zhvillohet.

Nëpërmjet një komunikate zyrtare, Formula 1 ka njoftuar se gara e programuar për t’u zhvilluar në Soçi, në shtator, nuk do të bëhet për shkak të situatës së krijuar në Ukrainë, pas sulmit ushtarak nga ana e Rusisë. FIA ka biseduar me të gjitha skuadrat të ndodhura në Barcelonë për testet parasezonale dhe më pas ka marrë vendimin.

“Kampionati i Formulës 1 zhvillohet në vendet e gjithë botës, me objektivin për të bashkuar njerëzit dhe kombet, – shkruhej në komunikatën e FIA-s. – Jemi duke ndjekur zhvillimet në Ukrainë me shumë trishtim, me shpresën për një zgjidhje sa më të shpejtë e paqësore. Pas një bashkëbisedimi me të të gjitha skuadrat e Formula 1, arritëm në një vendim unanim se është e pamundur për të zhvilluar Çmimin e Madh të Rusisë në rrethanat aktuale.”

Por anulimi i garës së Rusisë, i programuar në fundjavën e 23-25 shtatorit 2022, do të sjellë ndryshime në kalendarin e sezonit të ardhshëm të Formula 1. Edhe pse për momentin nuk është thënë që ajo garë do të zëvendësohet, pritet që në kalendarin e këtij sezonit të Formulës 1 të rikthehet Çmimi i Madh i Turqisë në Stamboll dhe të mos preket kështu numri i 23 garave të programuara.